Vawiin chawhnu khan Lunglei District Anti-Tobacco Squad-te chu an Chairman Lunglei DC Pi Lalzarmawii IAS kaihhruaina in a office chamber-ah an thukhawm a, hmalak dan tur hrang hrang an sawiho.

National Tobacco Control Programme (NTCP) hnuaiah hian District tinah District Tobacco Control Cell a awm a, chu chuan district chhunga vaihlo leh a kaihhnawih tihrem/tihtlem dan tura hmalatu tur Anti-Tobacco Squad a din a. District Anti-Tobacco Squad Chairman Pi Lalzarmawii chuan zuk leh hmuam do kawngah nasa zawka tan kan lak a tul a ni tiin Anti-Tobacco Squad chu taima leh ngun lehzuala khawchhung vil turin a chah a. Kan pi leh pute hun lai atang tawha kanlo chin than a nih avangin Mizote zingah zuk leh hmuam laka fihlim kan tlem em em a, kan taksaah nghawng thalo tak tak a nei tih hre chunga Vaihlo ban san kan tum lo hi a pawi takzet a ni, a ti. District Tobacco Control Cell in school hrang hranga Awareness Campaign an nei thin chu lawmawm a tih thu sawiin naupangte zuk leh hmuam laka an fihlim theihna turin hma la chhunzawm zel turin a chah a ni.

Member-Secretary Dr SR Ngurchamliana chuan kum kalta a hmalak dan tlangpui report a pe a. April 2017 atanga February 2018 chhung khan mi 269 hnenah Counselling pek an ni a, Squad Drive vawi 43 neih niin District chhunga School hrang hrangah Awareness Campaign vawi 37 neih a ni bawk.