Vawiin khan Champhai Vengsang YMA Hall-ah Champhai District Co-operative Society Ltd. Joint Action Committee (CDCSJAC) bultumin Champhai District Co-operative Society meet neih a ni a. He hun hmanpui tur hian Mizoram Co-operative Apex Bank (MCAB) Chairman Pi T. Lalmuanpuii , MIZOFED Vice Chairman Pu Thangrenga, Pu F. Zosanga Chairman (PIGFED) leh State Level Federation hrang hranga Board of Director-te an lo kal a ni.
He hun rawn hmanpuitu Pi T. Lalmuanpuii, Apex Bank Chairman chuan Champhai District chu Co-operative movement innghahna district pawimawh tak anih thu leh Co-operative movement chu Zoram khaichhuahna tura tangkai tak anih thu a sawi a. Co-operator leh thawktute inkar chu tih zim a tul thu leh shareholder-te chu Apex Banka-a lal ber an nih avangin an tana hnathawh uar leh zual angaih thu a sawi a. Apex Bank danah loan za zela 95 chu shareholder-te tana pek chhuah tura tih a ni, a ti a. Hengte bakah hian Apex Bank chuan a hnuaia thawktu officer leh staff-te tan Pension scheme pawh a duan chhuah thu a sawi a. Primary Agriculture Credit Co-operative Society (PACS) kaltlangin thingtlang kilkhawr zawk leh Bank branch awmlohna hmunahte bank service chawpchhuah sak an nih thu sawiin hemi kaltlang hian chhungkaw 1,571 chuangin eizawnna an neih theih phah thu a sawi a. Mizoram sawrkar hmalaknain New Economic Development Policy (NEDP) hnuaiah PACS zawng zawng computerize vek tum anih avangin lawmthu a sawi bawk a ni.
Tunhnai kum 5 chhunga Apex Bank hmasawnna kawng hrang hrang a tarlang a. Bank Branch thar 4 (Women Branch pakhat telin) leh Extension Counter pahnih hawn a ni a. Bank dang rualin Apex Bank pawh CBS platform-ah a lut a, Bank dangin an neih loh Data Centre Aizawla bun thei awm chhun an nih thu a sawi a. Computer mini lab hawn niin Safe Deposit locker Main Branch, Aizawlah hawn a ni bawk a. New Secretariat bulah sorkarin ram a pekah Branch Building thar sak zawh tawh niin luah nghal a ni, a ti a. RBI atangin Branch neihlohna hmunah pawh ATM dag (offside ATM) phalna hmuh a nih thu a sawi a. Apex Bank-in loneitute thlai thar leisak leh hralhna (marketing) lama hmalatu tur ‘Mizoram Agriculture Marketing Solution (MAMSol)’ a din a, Bairabi-a Cold Storage ( cheng nuai 150 man) a bun mek thu a sawi a. Sorkarin Zirlaite Scholarship lakna atan Apex Bank a hman tak avanga sorkar chunga a lawmthu a sawi bawk a ni.
Tin, Loan rulh loh avanga In leh Lo, ram dahkham Sorkar leh Court inrawlh ngai lova laksak theihna SARFAESI Act hman ve remtih a ni, a ti bawk a. Kum 5 chhungin Bank Staff 28 lai lak thar a ni a, NPA tih hniam tuma nasa taka hmalak niin Kum 5 lo awm leh tur chhunga Apex Bank hi Schedule Bank-a hlan kai hman ngei tum anih thu a sawi a. Cooperative Society te hmakhua ngaiin Shareholder Society 61 hnenah loan cheng vaibelchhe 4 pek chhuah a ni a, kumin 2017-18 chhung hian shareholder society te hnenah loan cheng vaibelchhe 5.24 pek chhuah leh mek a nih thu a sawi a. Hei bakah hian deposit-a punna chu cheng nuai 29,195 a ni a, profit-ah cheng nuai 326 anih bakah loan punna hi cheng nuai 13,299 niin Bank thanna Growth rate chu za zela 96 a nih thu a sawi lang bawk a ni. Co-operator kalkhawmte chu tang sauh sauh tur leh Co-operative Society movement hnuaiah mi tam zawk hruai lut thei tura hnathawk zel turin a sawm nghal bawk a ni.
MIZOFED Vice Chairman Pu Thangrenga pawhin MIZOFED in mipui rawng an bawlna kawng hrang hrang a sawi a. Gas leh POL hnianghnar zawka sem tura ruahmanna an neih leh MIZOFED in nasa taka hma a sawn chhoh mek thu a sawi bawk a ni. Thusawitu dang Pu F. Zosanga, PIGFED Chairman pawhin Vawk chaw hnianghnar zawk leh man tlawm zawka mipuite leitir an nih thin dan te, Vawk In sakna hmanraw changkang readymade an sem dante leh an hmachhawp mek kawng hrang hrangte a sawi bawk. Thusawi tha tak tak ngaihthlak a nih bakah hian zawhna leh chhanna hun hlimawm tak hman a ni bawk a.
Meet hi Pu Rolura Sailo, Chairman, Champhai District Co-operative Society Joint Action Committee (CDCSJAC) in a kaihruai a. Pu K.Lalsanga, Khawzawl-in kalkhawmte lawmna thu a sawi a. Pu Zaihmingthanga, Secretary, CDCSJAC-in Meet neih anih chhan leh Champhai District chhunga hruaitute inhmelhriattirna hun a hmang a. Pu R.Lalngaihawma, Secretary, Serchhip Consumers Co-operative Society Ltd-in mikhual inhmelhriattirna hun a nei a ni.
District report Pu Rodingliana, LIMCOS Ltd, Lunglei; Pu B.Dophaw, Siaha; Pu Lalhmingliana Saitual; Pu R. Lalngaihawma, Serchhip leh Pu K.Sanghluna, BOD, MCAB, Aizawl-ten an pe a. Zawhna leh chhanna hun a duh apiangte tana neih a ni bawk a. Pu T.Vanlalhruaia, Fin. Secretary, CDCSJAC-in lawmthu sawina neiin hun hi a khar a ni.
Co-operative Society-te sum tlingkhawm enkawl hna hi Mizoram Co-operative Apex Bank (MCAB) kutah a awm a. A enkawl hna pawh sawrkar leh Co-operative Society tangkawpin a thawk a ni. Kum 1992 atang khan chak zawka kalpui anih theihna turin a enkawlna hna hi Co-operative Society kuath dah niin Board of Directors thlangin an ni bakah hian Mizoram sawrkar ruat Director (Registrar, Co-operative Societies) leh Chief Executive Officer (CEO) ten an enkawl a ni. Mizoram Co-operative Apex Bank Ltd hi Mizoram sawrkarin mipuite hmasawnna tura July ni 31, 1982 a din, RBI Licence nei thlap a ni.
Vawiin Meet-ah hian Co-operative Society hnuaia Federation hrang hrang shareholder District chhung leh pawn atangin an tel a ni.
