UD&PA Minister hovin “Junction Improvement in Aizawl City” hnuaia Bawngkawn Junction leh peng pawimawh danga hna kal mek te sawihovin vawiin khan Assembly Budget Session Recess laiin New Secretariat Conference Hall-ah meeting neih a ni. Aizawl traffic tawt lutuk tizaiawm a, lirthei leh ke a kalte tan a lo him zawk nan leh Aizawl khawpui cheithatna ni pah fawmin NEDP hnuaiah Aizawl khawpui veng hrang hranga pengthuam pawimawhte laih zau a siamthat hna he hmalakna hnuaiah hian thawh a ni.
Minister chuan Junction Improvement hna thawh tan a nih atangin mawhphurtu Department hrang hrang ten thawhhona tha tak an nei zel chu lawmawm a tih thu a sawi a. Tuna Bawngkawn Junction-a hna thawh mekah pawh mipui tan rokhawlhna siamlo thei ang berin leh a hma thei ang bera hna thawh zawh a nih theih nan member te chu ngaihtuahna seng turin a sawm a ni.
Vawiin meeting-a hmalak dan tur ngaihtuah zingah kawng laihna lama Telephone Cable lei hnuaia inphum laihchhiat vanga harsatna awm thei pumpelh tura hmalak dan te, hna a chak zawk theih nan leh kawng hmangtute tibuai lo thei tur ang bera zan lama hna thawh dan tur te a tel a ni.
Vawiin meeting-ah hian UD&PA, PWD, PHED, P&ED, Road Transport & Highways, Police (Traffic) leh BSNL lama hotu te an tel a ni.
