PHE Department-in National Rural Drinking Water & Sanitation Awareness Campaign 2014 a hman mekah vawiin khan naupang leh tleirawl tana WaterART 2014 'on-the-spot painting competition' a buatsaih a, mipuiin an hlut hle.

He intihsiakna hawngtu Er. Lalmuanzova, Chief Engineer Zone-I, PHE Dept. chuan, Lemziak tur kalkhawm te chu, tui leh faina chungchangah nasa lehzuala hma la tur a fuihin, “thianghlimna hi mitin mawhphurna a ni a, kan tui sawngbawl danah fimkhur a ngai hle a, thangthar te hi kan tui hna kang lo tura hmala zel tur a kan inbuatsaih a ngai a ni”, a ti. Intihsiaknaa telte chu an ngaihtuahna anga huaisen taka lem ziak tura sawmin, thu leh hla lamah an ngaihtuahnate la hmang thiam chiah lo mahse, an lemziak hmanga an aia u zawkte rilru an hneh theihzia te leh Mizoram hmasawnna tura anmahni bak midang an awm loh ziate a sawi a, intihsiaknaa tel thei tura rilru an pe chu lawmawm a tih thu a sawi bawk.

Intihsiakna hi hmun (category) hnihah then niin; kum 12 hnuailam leh kum 13 leh 18 inkar tana buatsaih a ni a. Kum 12 hnuailam hian 'Ruahtui khawlkhawm' chungchang an ziak a, kum 13-18 inkar hian 'Tui pawimawhna' tih thupuiah an hmang thung a ni. He intihsiakna hi mi 61-in an bei a, kum 12 hnuailamah mi 40 an tel a, kum 13 leh 18 inkarah mi 21 an tel thei a ni. Lemziaka intihsiakna lawmman hi zanina tan tur The Water Challenge, Inter College Quiz Competition, PHE Department leh LPS-te tang dun buatsaih tur an final zanah (Zirtawpni Dt. 28.2.2014) puan a ni ang.

Awareness Campaign ni thumna hi naktukah Vanapa Hall-ah chhunzawm a ni ang a. He hunah hian 'Village Water & Sanitation Committee (VWSC) Meet' hman a ni ang a, Mizoram hmun hrang hrang atangin VWSC OB-te kalkhawmin, anmahni khua theuha an hmalaknate, hmasawnna leh harsatnate an ngaihtuah ho dawn a ni.