Naupang huaisen lawmman “National Bravery Award”, 2013 dawngtu mizo naupang pali te chu vawiin khan Social Welfare Minister leh Mizoram State Council for Child Welfare (MSCCW) President ni bawk Pu P.C.Lalthanliana’n a pisaah lawmpuina thingpui in puiin chawimawina a hlan.

He lawmpuina inkhawm MSCCW working President Pu J.C. Japanruna kaihhruaiah hian Minister chuan Mizo te inchhuanna ber thin pakhat chu huaisenna a ni tiin, hnam huaisen thian chhan thih ngam kan nihna a taka lan tirtu naupang Mizote’n kan nei chu lawmawm a tih thu a sawi a. Minister chuan naupang huaisen lawmman dawngtu te chu lawmman beisei vanga huaisen nilova, an huaisen avanga lawmman an dawng chu ropui a tih thu leh chhuanawm a tih thu sawiin, an huaisenna vawng nung zel turin a chah a. Minister chuan heng naupang huaisen tak tak te hian an phu tawk chawimawina an dawng tawk lo nia a hriat thu sawiin, mi ngaihsanawm leh chhuanawm tak tak te kan ngaihsan leh an phu tawk chawimawina pek Mizote’n kan zir a tul takzet a ni, a ti.

Naupang huaisen te hi Minister hian chawimawina thuziak leh pawisa fai cheng singkhat theuh a hlan a ni.

Naupang huaisen lawmman National Bravery Award , 2013 dawngtu mizo naupang palite chu:

Hani Ngurdinthari, kum 15, Lengte, Mamit District. Hani Ngurdingthari hian kum 2013 khan a thiante Dialdawk lui a tla tum li lai a chhanchhuak a ni. March 9  khan a thiannu Lallawmawmi D/o Hmunsiama tui tla chhanhimin, April 29 khan Malsawmzuali D/o Lianmawia a chhanchhuak leh a, May 11 khan  a thian te pahnih Zorinpuii D/o Zohmingliana leh Lalchhanhimi D/o R.L. Daniela te a chhanchhuak leh a ni. June  8 khan Malsawmtluangi leh a thiante nena ram atanga an haw Dialdawk lui an kan laia tui lianin a lak Vanrosanga pawh a chhanchhuak bawk a ni.

Malsawmtluangi (L), kum 13, Lengte, Mamit District, Lalduhawmi fanu hian June 8, 2013-a a thiante nena chawhmeh la a an ram kal haw chu Dialdawk luiah an chesual a, a nau Vanrosanga leh a thiannu Lallawmawmi te chu tuiah an tla a. Malsawmtluangi hian chhan tumin luiah hian a zuang thla ve nghal a, mahse tui a thiamloh avang leh tui a khauh em avangin chhan hman  lovin a nunna hial a chan phah ta a ni.

Vanlalhruaia,  kum 10 , Hmunsam Veng, Mamit, Lalramnghinglova (L) fapa hian May ni 4, 2013 khan a thiannu Zomuanpuii Tuidai luia tla chu a chhanchhuak a. Vanlalhruaia leh a thiante pahnih Zomuanpuii leh Lalramdinthari te hi Tuidai Darbenli-ah an kal tumin an thiannu Zomuanpuii chu tlusualin Tuidai luiah a tla thla a, Vanlalhruaia hian chhanchhuah tumin luiah a zuanglut ve nghal a, Zomuanpuii tui atanga a lak chhuah hnu ah, khaw chhungah  midang pun turin a tlan lut lehnghal a ni.

Remlalhruaitluangi, kum 9, Hruaikawn Champhai District D/o Vanlalthanga. April ni 4, 2013 khan Remlalhruaitluangi hian a thiante pahnih Maichammawii leh Lalthanpuia, Tiau luia tla chu chhan tumin theihtawpin a bei a, Lalthanpuia chu chhanchhuakin Maichammawii erawh a chhan hman ta lo a ni.

National Bravery Award dawngtu te hian hian medal, chawimawina thuziak leh pawisa fai an dawn bakah class XII an zir zawh thleng scholarship an dawn ang a, Engineer leh Medical lama kalte chu an graduate thleng scholarship pek an ni ang.

National Bravery Award hi mizo zingah mi 26 in an lo dawng tawh a, an zinga mi 9 te hi thih hnua hlante (posthumous awardee) an ni.