Kolasib District Level Vigilance and Monotoring Committee chu vawiin khan Chairman pahnih Lok Sabha MP Pu CL. Ruala leh Rajya Sabha MP Pu Lalhmingliana hovin Kolasib DC Conference Hall-ah an thukhawm a. Pu K. Lalrinthanga, Parliamentary Secy, Member, Vigilance & Monitoring Committee pawh he hunah hian a tel a ni.

Vawiina Committee hi Pu CL. Ruala’n a kaihruai a. Tun tuma Committee chu tun 15th Lok Sabha hun chhung leh Financial Year kal meka a hnuhnung ber tur a nih thu sawiin he Committee kaltlang hian hmasawnna tamtak an hmuh avanga a lawmthu pawh sawiin amah leh Pu Hminga chu Mizoramin Central lama harsatna an neihte sukiang tura theihtawp an chhuah thin thu pawh a sawi a ni.

MP pahnih Pu CL Ruala leh Pu Lalhmingliana te hian thu sawi ve vein anni politician te chu sava thlawk anga inthlak fo ni mahse sawrkar hnathawkte chu awm reng an nih avangin mipui leh ram tihmasawn tura theihtawp chhuah a tul an tih thu an sawi a. Ti thei dinhmuna din laia mipuite tana hriat tham hna thawh hi nakin hnu thlenga mahni lawmna min thlen lettu an ni, an ti a. Central hian kumtin tangka nuai za tamtak thingtlang tih hmasawn nan a seng a. Hengte hi dik taka kan hman a ngai a ni, an ti a. An hun chhunga Meeting vawi tamtak an neih tawhnaah member te tana hriat hrehawm leh an duh reng vang pawh nilova tawngkam duhawm loh deuhte anlo hmang a nih pawhin chu chu an thahnem ngaihna vang liau liau a ni tih sawiin hriatthiamna pawh an dil nghal a ni.

Committee ah hian PHE, PWD, P&E, RD Department leh Social Welfare Department ten District chhunga Central sum hmanga hna kalpui mekte an thlir hova. PHE chuan Centre-ah Solid & Liquid Waste Management kalpui dan tur project an thlen mek tih tarlan a ni a. DRDA, Kolasib in MGNREGS hnuaia ni 100 inhlawhna a kalpui mekah ni 30 chauh inhlawhna neih a ni leh ni 10 dang a ba-a kalpui a ni chu MP pahnihte chuan an duhkhawp loh thu sawiin Department thawktute chu chiang lehzuala in enfiah tul an tih thu an sawi a ni. PWD in a hmachhawp Khamrang-Mualkhang Road siam dan tur chungchang pawh sawi hovin hei hi an estimate ang ngeia changkang taka siam an nghahhlelh thu pawh an sawiho a ni. CDPO Thingdawl leh Bilkhawthlir ten Tar pension an pek thin chu khaw chengker amite tan tangka tlem tham lam tura kal fo a ngaih avangin an tan ruahmanna tha siamsak a tul thu MP te leh MLA tehian an sawi bawk a. Scheme kalpuina kawngah Department te a theih ang chen chena inthuruala kal (convergence) tura rawn ni mahse hei hi tun dinhmunah a harsat thu leh guideline fel tak siam a tul thu pawh Department hotuten meeting ah hian an sawi a ni.