Vawiin khan Mizoram University Education Conference Hall-ah ‘One day conference on Strategies for Development of Mizoram’ tih chu buatsaih a ni a. He hunah hian Mizoram Governor Pu Kummanam Rajasekharan chuan Conference hawnna thuchah a sawi a ni.

Mizoram chu a hnam ze hrang hrang avangte, a leilung hausakna leh mawina te leh boruak nuam tak avanga te a hmasawnna tur tam tak a la neih thu sawiin, India hmarchak biala ramte zinga hmasawn ber a nih theih thu a sawi a. Food Processing industry din chu hmalakna pawimawh tak, mi tam tak tana eizawnna siam theitu a nih thu a sawi a ni. Sawrkar laipui pawhin Mizoram chu India bamboo capital-a siam a duh thu sawiin, chu hmalakna tihlawhtling tura vawiina kalkhawmte thiamna leh thlawpna a ngaih thu a sawi a ni. Mizoram chuan sawrkar laipuia scheme chi hrang hrangte a la chhawr tangkai tawk loh tiin, heng scheme-te chhawr tangkai tura ruahmanna mumal tak siam a pawimawh thu a sawi bawk a ni.

Pu Ashish Kundra, Commissioner and Secretary, Higher & Technical Education department chuan zirna lama mithiamte leh sawrkar inkara thawhhona chu hmalakna duhawm tak a nih thu a sawi a.  Thalaite tana eizawnna siam chu sawrkar tan pawha chona lian tak a nih thu sawiin, eizawnna siam a nih chuan eng hna pawh thawh an hreh loh tur thu a sawi a ni. Education Summit, State sawrkar leh Mizoram University-te buatsaih nakum February-a neih turah Governor chu chief patron a nih thu a tarlang bawk a ni.  

Planning and Programme Implementation department Secretary Dr. C. Vanlalramsanga chuan vawiina conference thupui chu an department pawhin a ngaihpawimawh berte zing ami a nih thu a sawi a. Development strategy chuan market, sawrkar leh vantlang te chu rualkhai taka chawikan a tum tur a ni, a ti. Ram hmasawn tura hmalakna tur chi hrang hrang chu awm mahse chungte chu a tahtawla an pawimawh dan a zira hma lak a tul thu a sawi a ni.

Pu Rakesh Srivastava, General Manager, NABARD pawhin khawpui leh hmundang inhmasawn hleih te,  ram thil dehchhuahna tih chak a ngaih thu leh Mizoram ramdangte hriata phochhuah a ngaih thu te a sawi a. Hmasawnna rulrel siam lama hna inthawhthuah pumpelh tura master plan neih a tul thu a sawi bawk a ni.

Vawiina conference hi Pro-Vice Chancellor Prof. R. P. Vadhera chuan a kaihruai a. Vice Chancellor Prof. KRS Sambasiva Rao chuan conference hun chhunga an sawiho turte khuhhawnna a nei a ni. Hemi zawh hian department hotu hrang hrangten presentation pein, sawihona an nei bawk a ni.

 

Attachment

  • Loading attachment...