Kolasib Dated the 8th March, 2021 : Vawiin khan Parish Hall, Venglai, Kolasibah International Women’s Day 2021 lawmna chu ‘Choose to Challenge’ tih thupui hmangin One Stop Centre, Kolasib District, Women & Child Development, bultumin hman a ni a, Pi Lalvenhimi Ralte, Nodal Officer chu khuallian a ni.

Pi Lalvenhimi Ralte chuan International Women’s Day in a tum bulpui ber tarlangin, dinhmun harsa zawk hmachhawn mek hmeichhiate chawikan an nih a, mipa leh hmeichhia intluktlanna khawvel siam hi a ni, a ti a, hemi kawngah hian khawvel hmun hrang hrangah hmasawnna nasa tak hmuh mek a nih thu a sawi bawk a ni. India ramah pawh sawrkarin hmeichhiate dinhmun chawikan hi a ngaih pawimawh thu sawiin One Stop Centre, Mahila Shakti Kendra leh Swadhar Greh te hi hmeichhe dinhmun siamthatna leh chawikanna atan a sawrkar ruahman a ni a, a nihna tur anga tangkai tak a hmang turin kalkhawmte a chah. Hmeichhiate dinhmun chawikan tih hian uchuak tak a mipate aia chungnung a indah tumna lam ni lovin dik lo tak a rahbehna hnuai a awm mek hmeichhiate dinhmun chawikan a, an chanzo humhalh sakna lam a kawk zawk a ni, a ti a, hemi tihlawhtling tur hian NGO leh sawrkara mawhphurhna latute thawhhona a pawimawh thu a sawi bawk a ni. 

Pi C. Zochhuanthangi, Case Worker, One Stop Centre chuan report pein, August 2019 atanga December 2019 thleng khan, hmeichhe chunga hleilenna kaihhnawih ah case 7 ziahluh a nih thu leh January, 2020 atanga December 2020 thleng khan case 35 ziahluh a nih thu a tarlang a, 2021 January atanga vawiin thleng hian case 2 ziahluh a awm mek thu a sawi bawk a ni.

He hunah hian Pi Baby VL Ruatkimi, DLA chuan hmeichhiate dikna chanvo chungchangah zirtirna pein, One Stop Centre, Kolasib district atangin thusawi ngaihthlak a ni bawk a ni. One Stop Centre hi a mamawhtute tan engtiklai pawh a pan theih reng an ni a, darkar 24 chhung an ni hawng a ni.