Sawrkar Laipui, Ministry of Petroleum & Natural Gas hnuaia Oil and Natural Gas Corporation Limited (ONGC) a Board of Directors-a Director(Exploration) Pu N.K. Verma leh a thawhpui senior officer paruk zet chuan Geology & Mineral Resources Minister Pu H.Rohluna sawmna angin Mizoram-a Oil leh Gas zawn leh laihchhuah kalpui dan chungchang sawiho turin nimin khan Aizawl an lo thleng, chawhnu khan Minister hi a Office-ah hmuin meeting pawimawh tak an nei a ni.

Minister hi Parliamentary Secretary Pu Joseph Lalhimpuia chuan tawiawmin meeting-ah hian Secreatary, Geology & Mineral Resources Department Pu Ashutosh Kumar, G & MR Department, Director, Dr. H. Lallenmawia leh Department senior officer engemaw zat an tel a ni.

Pu H. Rohluna chuan ONGC hotulu chu a sawmna ngaipawimawh a Mizoram a rawn tlawh thei chu lawmthu hrilh a. Minister chuan ONGC chu Mizorama-a Gas hmuchhuak hmasa bertu Company anni chu a lawmpui thu te, tunah hian khurdang verh leh tura thlan fel vek tawh, verh tura hmalak thuai thuai a tul thu te, khur dang pathum (3) Meidum leh Hortoki inkara a ruahman chin pawh tihhlawhtling thuai tura a tul thu sawiin, a tul anih chuan Mizoram Sawrkar pawhin a theihna chinah puih a in huam reng thu a sawi bawk.

Minister hian oil leh gas zawng chhuaktu company dang, OIL hovin hma an lak dan, khur hnih thum a, a rual site preparation kalpui theih nise tiin hetianga an tih hian chak zawka hma an lak theih a rin thu a sawi bawk.

A sawizelnaah Minister chuan a theih chin chinah Labour atanga Semi Skilled leh Skill leh dinhmun sang deuh thlengin a ram mi ngei chhawr a tul a nih tih a sawi a, hei hian ONGC tan thil tamtak a tih awlsam phah ang a ti. Kum tin License Fees leh thlatin Technical Progress Report pawh State Sawrkarah a hun taka pe chhunzawm zel turin a chah bawk.

Parliamentary Secretary Pu Joseph Lalhimpuia chuan ONGC hmalakna chu Mizoram Sawrkar leh mipuiin beiseina sang tak neiin an thlir reng a ni tiin meeting hian ONGC hmalakna a tih chak ngei a rin thu a sawi a. Company ten a khawtlang rawngbawlna an neih ‘Corporate Social Responsibility’ (CSR) hmangin an theihna apianga a tam thei ang ber khawtlang leh mipuite tan thil tha leh tangkai turte kalpui zel turin ngen bawk.

Director (Exploration) ONGC chuan gas zawnchhuah hna hi chak thei ang bera kalpui anih tur thu Minister a hrilh a, chutih rual chuan Mizoram ang ram chhengchhia-a hnathawh a har thu te leh a hun tiam chin ang thlipthlepa hnathawh a har thu te, kawngchhiat thu te, ruahtui avanga harsatna an tawh mekte sawiin a theih anga chaka hma an lak zel tur thu a sawi bawk.

Kawng zau tawk loh leh leidawh thuamthat ngaite avanga an oil rig leh bungraw rit phurh chu harsatna lian a tling thu meeting ah hian sawichhuah a ni a, he thilah hi Mizoram Sawrkar leh ONGC chuan Joint Survey nei a hmalak dan tur thlirho nise tih a ni a. Director(Exploration) chuan hemi atan sum mamawh engemaw zat an thawh ve theih tur thu sawiin ONGC chuan Minimum Work Programme a bithliah aia tam zawk hna an thawh tur thu a sawi bawk.

Skill Development chungchangah thiamna sang ngai lo ang chi hna hrang hrang – welding, electrical leh mechanical semi skilled tan hian training mi 20 rual tan kar 1 atanga thla 1 angte chu an buatsaih theih thu sawiin Pu N.K. Verma chuan M. Tech degree nei zirlai tan Phd sponsorship leh research lama an puih theih thu a sawi bawk.

Mizoramah company dangte thawk mek awm vete pawhin harsatna an tawk ve tho tih sawiin State Sawrkar chauh pawh nilo, India ram tana chhenfakawm an hmuhchhuah ngei an beisei thu an sawi.

Sawihonaah hian Technical Discussion neih niin Director (Exploration) rual hian Pu C. Mahapatra, Basin Manager, Assam & Assam Arakan Basin; Pu F. Dotiwala, Block Manager; Pu M C Das, Head, Cachar Forward Block;Pu K. C. Kothiyal, AC Range Member, Pu B S Bora EA to Director leh Pu A Sen, Protocol Officer te an lo tel a ni.

Mizorama Oil leh Gas zawnchhuah hna hi New Exploration Licensing Policy III(NELP) 2003 anga kalpui mek a ni a. Tunah ONGC in hmalakna an neih mek Meidum leh Hortoki hi Block AA-ONN 2001/2 tih niin Phase I leh Phase II a Minimum Work Programme an tiam chin chu an zo tawh a, tunah hian a thawh thumna Phase III atan hma an la mek a ni.

ONGC hian Meidum a khur laih hna chu February ni 1, 2011 khan tan in January ni 10, 2012 khan metres 3859 thuk lei an verh hnu ah gas an hmu a, he gas reserve hi a tam dan la chutchhuah theih ani lo a, gas tam dan leh a zat hre thei tur chuan hydro-fracturing tih a ngai dawn thu mithiamte hian an sawi, he thil tih theih nan hian tunah hma lak mek a ni.

ONGC mithiamte hian Tripura ah gas a awm tih an finfiah leh an laih chu kum 30 kalta daih tawh khan a ni a, amaherawhchu a hman dan an hriatfuh theih loh vangin kum 5 kalta khan power siamchhuahna atan ruahmanna siam chu an kalpui chauh tih an sawi a, Tripura a an tawnhriat tam tak chuan Mizorama an hnathawh leh hmalaknate a pui thin fo an ti bawk.

Tripura a gas zawnchhuah hna an thawh hunlaiin Environmental Clearance ang te hi a la awm ngai lovin an duh duh naah lei an verh mai thin a mahse tunlai chuan Environmental Clearance te, Pollution Clearance te, leh thil dang tul tak tak tih hmasak phawt a tul thin vangin duh ang thala chak taka hma lak a harsa a ni.