Nizan (6 June 2014, 7:15PM) khan Lunglei Electric Veng YMA chuan kumin HSLC & HSSLC Examination-a zirlai hlawhtlingte chawimawina hun Electric Veng Community Hall-ah an hmang a, he hun hi Bialtu MLA Pu Joseph Lalhimpuia, Parliamentary Secretary i/c Education-in a hmanpui.

Zirlaite chawimawina inkhawm hi Electric Veng YMA Education & Literature Sub-committee Chairman Tv C. Lalpianthangan a kaihruai a. Khuallian Pu Joseph Lalhimpuia chuan zirlaite fuihna thu sawiin Mizo hnam siamtha tura thil pawimawh ber chu zirna a ni a, khawtlang leh vengchhung hmasawnna leh ropuina pawh thiamna leh zirnaah a innghat a ni, a ti. Zirna hi khawtlang hruaitute leh tlawmngai pawl te pawhin ngai pawimawh theuh tura a duh thu a sawi a. Mizote vanneihna chu Sap missionary ten ziak leh chhiar min zirtir kha a ni a, vawiina kan thlalaite vanneihna ve thung chu India ram inrelbawlna felfai tak hnuaiah zirna chawisan a nih zel leh zirlaite tan hamthatna hrang hrang sorkarin a ruahman thin hi a ni, a ti.

Parliamentary Secretary Pu Josepha chuan zirlai tithate lawmpui nan Rs.15,000/- Branch YMA Electric Veng Education & Literature Sub-committee hnenah a hlan a. Zirlai hlawhtlingte hnenah lawmpuina Citation leh lawmman hlanna hun a hmang nghal a ni.