Tripura Transit camp a Reang (Bru) la awmte la let tura inpuahchahna (6th batch repatriation) chu kalpui zel a ni a.  

Hemi chungchangah hian Mamit DC Pu K.Lalthawmmawia hovin Mamit SP, Home Dept. lam hotute, Nodal Officer leh DIPRO, Mamit te chuan nimin June 6 khan North Tripura DM Pu Sandeep Rathod leh sorkar mi pawimawh dang te nen Reang (Bru) lakletna a thawh ho dan tur chungchangah inbiakna neih a ni a. Reang (Bru) ho an camp atanga an chhuahna tur motor leh venhimna chungchangah inbiakna hi neih a ni. Inbiakna ah hian June 17&18 chu Reang (Bru) laklet ni tur a ruahman a ni.

Tripura sawrkar nen inbiakna bawhzuiin vawiin khan Mamit DC Pu K.Lalthawmmawia hovin a pisaah sorkar dept. hrang hrang hnuaia officer ten 6th batch repatriation neih ni a hmalak dan tur, lo dawnsawn dan tur leh a dawngsawngtu tur te ngaihtuah ho a ni a. Lo dawnsawnna hmun atanga an awmna tur khua a hruai tur motor leh an chen lailawkna tur chungchang chu vawiin meeting a ngaihtuah ho langsar zual a ni.

Mamit district atanga lo lut tur Reang (Bru) te hi Kanhmunah leh Zomuantlangah lo dawnsawn an ni ang a, heta tang hian Tripura Transit camp a an awm hmaa an chenna assembly constituency-ah theuh hruai tura ruahman a ni. Tarlan tawh angin 6th batch repatriation hi self-repatriation tur a ni a, lo let tur a hming inpe te chu anmahni finfiah a chian phawt an ni a. Hming inpe atangin chhungkaw 459 te chu laklet tur a ruahman a ni.