Vawiin khan ONGC, Silchar chuan Kolasib DC Pu Lalfela Sailo hnenah office hnathawh nana hman tur Computer set 5 (panga) an hlan a, Hmeichhiate chawikanna chungchang programme buatsaihna tur pawisa cheng sing nga (Rs 50,000/) an hlan bawk.

Heng thilpek hlanna inkhawm hi DC office chamber, Kolasib ah neih a ni a. Pu Anuj Saxena, Chief Engineer chuan Pu Lalfela Sailo hnenah Computer set 5 leh Rs 50,000/- Cheque tehi a hlan a ni. Pu Anuj Saxena chuan, ONGC hian Corporate Social Responsibility CSR Scheme a kalpui mek hnuaiah thilpekte hi hlan a ni tih a sawi a. He scheme hnuaiah hian Institution engemaw zat anlo tanpui tawh tih a sawi a. Tuna Women empowerment, hmeichhiate chawikanna tura pawisa an hlan pawh hi Mizo hmeichhiaten an dikna chiang zawk anlo hriat theih nana ruahman a ni, a ti a. Mizoram leh hmar chhak state hrang hranga hmeichhiate hian ram pawn hmun danga an kal tein harsatna an tawk fo thin a. Heng tehi hmeichhiaten huaisen taka an do let theihna tur chuan an dikna chanvo te an hriat chian a tul takzet a ni, a ti a ni.

Pu Lalfela Sailo chuan ONGC ten midangte tanpui tura tha leh sum an sengso thin hi an fakawm hle a ni tih sawiin an kal zelna turah pawh duhsakna a hlan a. An duh ang ngeiin programme tha tak, Kolasib ah buatsaih ala ni dawn a ni, a ti a ni.

Vawiina Computer leh Cheque hlanna hunah hian Pi Lallianpuii, DIPRO leh Media mite bakah DC Office Officer te leh ONGC Official te an tel a ni.

ONGC hian tun July 29 leh 30 khian rualbanlote pualin Camp, Silchar-ah an buatsaih dawn a. Heta kal tur hian Mizorama rualban lote an sawm a. A mamawhte tan hmanrua, Appliances a thlawnin an pe nghal dawn a ni.