Chief Minister Pu Lal Thanhawla sawmna angin vawiin tlai dar 5 :30 khan Oil & Natural Gas Corporation Ltd (ONGC) hotu te leh Oil India Limited (OIL) North East Frontier hotu ten Chief Minister hi a chenna bungalow-ah an hmu.

Chief Minister Pu Lal Thanhawla chuan sorkar-in leilung hausakna haichhuaha mipui ten a hlawkna zar an zo theih dan tur a ngaihpawimawhzia thu Oil Company hruaitute hi a hrilh a. An hna thawh kallai mek chu chak leh zuala an thawh theih nan Mizoram sorkar chuan theihtawp a chhuah reng dawn thu hrilh bawkin, state sorkar tih theih piahlamah erawh central sorkarah thlen zel a ni ang a ti a. ONGC hotute hian oil leh gas zawnna kawngah khur tam tak laih tur a awm avangin kawng tha an mamawh thu Chief Minister hi an hrilh a. Human Resourse development tih chakl zawk theihna turin Mizoram zirlai mithiam te hnenah training an pek theih tur thute an sawi bawk a. Petroleum Technology zirna lam pawh a pawimawh thu an sawipui bawk a ni.

ONGC hian Hortoki leh Meidum-ah te hnathawkin, natural gas an hmuh chhuah tawh chu engtianga tam nge awm tih ala hriat theih loh thute sawiin, khur dang Pangbalkawnah laih anih tur thu an sawi bawk. ONGC hotute hi Firoze Dotiwala, General Manageer (Geology),AAFB Blockin a ho a, Dr. Lallenmawia, Director, Geology & Mineral Resources in a rawn tawiawm a ni.

Oil India Limited hotute hi Dr.Rahul Dasgupta, General Manager, NEF in a ho a, an hnathawhna hmun hrang hrang Kaifang, Thenzawl, Maubuang leh Phulmawia an hmasawn dan te Chief Minister hi an hrilh a ni. OIL hian nakumah Thenzawl-ah leh Maubuanag-ah lei verh hna an thawh tan tur thu an sawi a. Keifang leh Phulmawi-ah hian hna bul tanna tur civil works an khawih mek thu an Chief Minister hi an hrilh bawk.

Oil company pahnih ten Chief Minister an hmuh zawah hian United Sports Association of Mizoram (USAM) hruaitu ten Pu Lal Thanhawla hi hmu lehin, Mizoram a sports association hrang hrang 32 ten a hmalakna tam tak avanga hmasawnna thahnem tak an hmuh thuah lawmthu sawiin, lawmpuina thilpek an hlan bawk a ni.