No.4038/2021-2022
Aizawl, the 18th February 2022 : IGP (Hqrs), Mizoram Police leh Chief Public Relations Officer, Mizoram Police Media Cell ni bawk chuan Online inbumna chungchanga mipuite fimkhur tura chahin a hnuai ami angin ngenna a chhuah.
Tunhnaiah internet kaltlanga inbumna a hluar hle a, heng inbumna hrang hrang zingah hian Armed Forces Officer / Sipai anga inchhal, an thlalak, I.D., etc. daha mi bum ching an tam hle. Heng mite hian bungraw hrang hrang- motor, bike, inchhung bungrua te zuarin, a man an dawn hnuah an bungraw zawrhte a leitu hnen thlen lovin an bibo thin a ni.
Heng mi bum chingte hian sipaiho tana eitur (sangha, sa chi hrang hrang, cake, balhla, etc.) order derin a zuartute an bum thin bawk, an order man pekna turin a zuartute hnenah QR Code scan tirin a zuartute pawisa an lakchhuah sak thin a ni. Hetiang hian mi tamtak an bum mek a. Hriattur pawimawh tak chu kan account a pawisa lo lut turin six (6) digit UPI PIN GPay, BHIM emawah pek a ngailova, heng PIN pek ngai titu chuan bum a tum che tih hriattur a ni.
Tunhnaiah internet sumdawnna mi tamtakin an kalpui mek a, heng online kaltlanga sumdawnna (Instagram, Facebook, Whatspp business) zingah hian dik taka kalpui tam tak an awm laiin, misual thenkhat mi bum tum hrim hrima hetiang sumdawnna kalpui an awm mek tih hriat a tul hle. Heng sumdawnna kaltlanga bungrua kan lei/chah hmain a hnuaia point te hi enfiah phawt thin tur a ni.
1) A dawr tawhtute comment atangin a rintlak nge rintlak loh hriat tum hmasak ni se.
2) A dawr neitute leh pawisa pekna tur account hming/address a inmil em?
3) Bungrua a man pangngai aia tlawm uchuak lutuk a zawrhte hi inbumna a ni duh hle.
4) Online dealership, distributorship, etc. pe thei anga insawi tamtak hi inbumna a ni tlangpui.
