Vawiin khan Lunglei DC Conference Hall-ah Bawrhsap Pi Lalzarmawii, IAS kaihhruanain District Level Committee on Swachh Bharat Mission (Urban) thutkhawmna neih a ni a, Lunglei DC chuan Lunglei khawpui chu Open Defecation Free (ODF)-ah a puang a ni.

Pi Lalzarmawii chuan thutkhawm chhan sawiin Ministry of Urban Development leh Ministry of Drinking Water & Sanitation te hmalakna in Swachh Bharat Mission hi India ram pum khawpui leh thingtlang ah te kalpui mek a ni tiin, he Mission in a tum chu India Hnampa Mahatma Gandhi piancham vawi 150-na, 2nd October, 2019-a lo thleng tur lawm nan India ram chu ram fai, khawlaia daikal leh zun ram thiar awm lohna ram a siam a ni, a ti. Pawna inthiar te hrem theihna order pawh sawrkar in a tichhuak tawh a, a ti thin te tan pawh rang taka insiamthat a ngaih thu a sawi bawk.

He thutkhawm leh khawpui faia puanna ah hian Nodal Department atangin Pu Andrew Lalhruaia, District Urban Development Officer chuan ODF a inpuang tura tih ngai zawng zawng an tihdan te leh hmalakna report a pe a. Pawn a inthiar awmlohna khawpui a inpuang tur hian Lunglei khawpui chhungah inthiarna thianghlim lo te ti thianghlim tura Sub-Hqrs YMA nen tangkawpa nasa taka hma an lak thu a sawi a, mimal inthiarna thianghlim 150 zet sak a nih bakah vantlang zunin leh ekin pawh 30 vel zet sak a nih thu a sawi a ni. Faina leh thianghlimna lamah mipui rilru kai harh zel tur leh zirtirna atan khawpui chhung hmun 8-ah faina lam hawi hoarding siam a ni bawk. Tun dinhmunah ODF a inpuang tura kaihhruaina, Ministry Of Urban Development-in a duan angin Lunglei khawpui chhungah sikul 87 atangin sikul naupang 8000 vel leh Self Help Group 58 leh khawpui chhung Village Council zawng zawng 24 ten he Declaration (Fai a inpuanna) hi an nei a ni.

Hetiang inpuanna hmasa Preliminary Declaration neih a nih zawh hian mipui ngaihdan lakna ni 15 chhung hawn a ni anga, rawtna hrang hrang te chinfel a nih hnuah Ministry of Urban Development hriatpuina in State sawrkarin endiktu a ruat anga, chumi hnuah tling a pawm a nih chuan Swachh Certificate Central sawrkarin khawpui tan a hlan dawn a ni.

Meeting-ah hian District Level Swachh Bharat Mission (Urban) Committee member te bakah Village Council 24 atangin member te an tel a ni.