Vawiin chawhma dar 11 khan sawrkar laipuiin Serchhip District-in pawna inthiar awm tawh lohna, Open Defecation Free (ODF) Certificate a hlan chu PHE Department-in District Bawrhsap Pi Sangchhin Chinzah hnenah an hlan a, he hunah hian Swachh Bharat Mission (Gramin) hnuaia District chhunga hmalak tawhna leh hmachhawp te sawiho a ni.

He hun hi District Bawrhsap leh SBM (G), Serchhip District Chairman ni bawk, Pi Sangchhin Chinzah chuan kaihruaiin, Serchhip District-in faina kawnga hma a sawnnaah sawrkar lam atanga thawktute, khawtlang hruaitute leh tlawmngai pawl te hmalaknaah lawmthu sawiin, faina kawnga nasa lehzuala hmala chhunzawm zel turin a sawm nghal a ni.

He hunah hian Er. F.Lalsanglura, Sr. EE, PHED, Serchhip WATSAN Division leh SBM (G) Member Secretary ni bawk pawhin thusawiin, Serchhip District chu Mizorama District dang zingah hma la chak te zinga mi a nih thu sawiin, District chhung khua zawng zawngah vantlang bawlhhlawh bawm sem chhuah a nih tawh thu a sawi a, bawlhhlawh paihna hmun pawh khaw 8-ah sak zawh tawh a ni tih a sawi a, Swachh Bharat Kosh (SBK) hnuaia district chhunga ek in 1346 siamthat tura ruahmanna pawh thawh zawh tawh a nih thu leh hemi atana sum lo kal pawh pelhe lovin a dawng turten an dawngkim nia a hriat thu a sawi a, Central a\anga hnathawh endik tura lo kal te pawhin an hnathawh chu tha an tih thu a sawi bawk a ni.

Tv. Samuel Lallawmzuala, District Co-ordinator, SBM (G) hnen atangin report ngaihthlak a ni a, report atanga a lan danin, SBM (G) hnuaiah thingtlang khua 35 a awm a, heng khaw hrang hranga ek in nei lo 422 te chu ek in (sanitary complex) sak zawhsak an nih hnuah SBK hnuaiah ek in (sanitary toilet) 1346 chu siamthat zawhfel a ni tawh a, June ni 29, 2017 khan District chu khawlaia inthiar awm lohna (ODF)-ah puan a ni tawh a, khaw 8-ah Solid Liquid Waste Resources (SLWR) hnuaiah bawlhhlawh paihna sak zawh tawh a ni a, bawlhhlawh paihna hi khaw 23-a sak leh turin ruahman mek a ni a, vantlang inthiarna (sanitary complex) pawh khaw 12-a dah turin ruahman a ni a, faina leh thianghlimna kawnga hmasawn zel theihna tur leh District ODF a nih tawh chhawm nun zel a nih theihna tur atan hmun hrang hrangah awareness campaign neih reng a ni bawk a. Tunah hian Central sawrkar ruahmannain Water & Sanitation Committee (WATSAN Committee) chu khawtinah dinthar mek a ni a, he committee hian an pawl hmingin bank account an hawng ang a, an khaw tana hnathawhna tur sum pawh Direct Benefits Transfer (DBT) hmangin an account-ah sum thun zel a ni dawn bawk a ni.

He hunah hian Sawrkar Department hrang hrang hotute, tlawmngai pawl hruaitute leh thuthar lakhawmtute an tel a ni.