Vawiin khan Pu KT Beicho, IRAS, Commissioner & Secretary PHED, State Level ODF verification Team Chairman ni bawk chuan ODF District nihna chawimawina Certificate chu Kolasib DC Conference Hall ah Kolasib Bawrhsap Pu R Zarzosanga kutah a hlan.

Pu KT Beicho chuan ODF District nih hi a tawk mai loa, chhunzawm tur tamtak awmin ODF nihna chu chhawm nun reng (Sustainability) a ngai a, mihring hrisel zawk nan tui thianghlim tlan bakah boruak a lo thianghlim zawk nan tui chhe paihna tha taka siam (Total Sanitation) te chu kan ngaih pawimawh a tul takzet a ni a ti a. Thianghlimna leh hriselna chu rilru puthmang ah chauh niloin a taka kan nunpui a pawimawh a ni tiin India ramah State 11 chu ODF a puan tawh an ni a, Mizoram chu State 12 na kan nih ngei theihnan tan lak a tul thu a tarlang bawk.

Er. K.Zohmingliana Sr.EE PHED, State CoOrdinator Swachh Bharat Mission (Gramin) ni bawk chuan ODF District ni thei tura Sawrkar Laipui ina kalphung a zam chu tarlangin, VC te hmalakna in khua chu ODF ah mahni a inpuan tur a ni a, chu chu BDO ah thehlutin, BDO chuan chu khua a chenna in za a sawmhnih (20% household) chu a endik anga, pawmtlaka a ngaih chuan District Swachh Bharat Mission Chairman (Dy Commissioner) hnenah a thlen anga DSBM hnuaia Verification team chuan chenna in za a panga (5%) an enfiah anga pawmtlaka an ngaih chuan State Mission Director SBM hnenah Chairman in a thlen leh anga State Level Verification team chuan chenna in za a pahnih (2%) an endik ve leh anga pawmtlaka an ngaih chuan ODF nihna chu an pawmsak thin a ni.

ODF hnuaia ek-in endikna ah hian ek-in chuan tui tlan ati bawlhhlawh tur a nilo, tho a awm tur a nilo tih leh ek-in chuan rim na a chhuah tur a nilo tih te chu tehfung ah hman a ni a,  Kolasib District a SBM(Gramin) huam chhunga chenna in 7608 atangin State Level Verification Team chuan chenna in za a pahnih (2%) chu April 2017 khan an endik a, khaw 2 a tehfunga tlinglo te chu siamthat tir an nih hnuin Kolasib District chu SBM(Gramin) hnuaiah Mizorama District 2 na ni turin September ni 1, 2017 khan ODF a puan a ni. Tun dinhmunah Mizoram chhunga District 5 te chu ODF a puan tawh niin Lunglei, Lawngtlai leh Mamit te chu ODF a la puan loh te an ni.

He hunah hian kolasib DC, District Swachh Bharat Mission Chairman ni bawk Pu R Zarzosanga pawhin thu sawiin Chawimawina Certificate chu Kolasib khawtualah ngei hlan an ni chu lawmawm a ti a, ODF ni thei tura thawhhlawk tak tak Sawrkar Department hrang hrang leh NGO hrang hrangte chungah lawmthu a sawi a, NGO hrang hrangte chu thawhpui chhunzawm zel ah a sawm bawk a ni. Pu Zarzosanga chuan Kolasib District a Bru chhungkaw 824 laklet tur te chu ek-in thianghlim leh tha an neih theihnan hmalakpui turin PHED hotute hnenah hian ngenna a thlen nghal bawk a ni.

He hun hi Er. C.Lallunghnema, Chief Engineer & Mission Director SBM(G) in kaihruaiin, Er. H.Lallianmawia, Sr EE PHED & Member Secretary, DSBM (G), Kolasib chuan lawmthu sawina in hun a khar a ni.