2816/2026-2027
Aizawl the 26th October, 2026: Home Minister chuan vawiin, October 26, 2026 khan Operation Trident hmanga Mizoram Police, Narcotics Control Bureau (NCB) leh Directorate of Enforcement (ED) te thawhhona kalpui dan chungchangah Press Conference a nei a. A hnuaia mi ang hian Press Statement an ti chhuak.
Home Minister, Mizoram Press Brief (26.10.2026)
Operation Trident – Mizoram Police, Narcotics Control Bureau leh Directorate of Enforcement te thawhhona
1. Mizoram Police, Narcotics Control Bureau (NCB) leh Directorate of Enforcement (ED) te tangkawp chuan 23rd October (Friday) 2026 khan Ruihhlo tawlh hluar lutuk tuk daih nan leh ruihhlo tawlha inhnamhnawih nasa a Kingpin te man chhuah a, Ruihhlo tawlhna hmanhraw hrang hrang / Narcotic Trafficking Network te chhuchat tura beihpui Operation Trident tia koh chu Mizoram, Assam leh Manipur-ah an kalpui a.
2. Heng agency hrang hrang atanga lak khawm team 38-te chuan hmun 38-ah a rualin Joint Operation neih a ni a – Mizoram chhungah Aizawl, Champhai, Lawngtlai, Zokhawthar, Manipur state ah Churachandpur leh Assam state ah Guwahati ah te beihpui thlak a ni. He operation- ah hian mi 18 man an ni a, detonator 500 leh pawisa fai nuai 12 man niin, bank account 1424 te freeze a ni a, sum leh pai thil neih hlutna cheng vaibelchhe 17.82 hu te provisional attachment a tih a ni.
3. Operation Trident-ah hian Mizoram-a drugs kingpin leh an thawhpui te beihna kawngah Intelligence in share leh thawh hona tha tak a awm a. Ni eng emawzat chhung intelligence thuruk lak khawm te finfiah a ni a, target te thliar hran niin, Mizoram Police leh Central Agencies te inrawnkhawmna high-level-a neih fo hnuah, he beihpui hi drugs syndicate te logistics leh an sum chetvelna a ruala tihchhiatna tur uluk taka duan a ni.
4. Tichuan, hmun khat atanga khaikhawmin, felfai taka kaihhruaina (surgical precision) hmangin multi-agency composite team 38 te chu hmun 38-ah a ruala tirh chhuah an ni a, Assam, Mizoram leh Manipur-ah an kal chhuak ta a. He beihpui hian khawpui lian leh ramri bial pawimawh tak – Mizoram-ah Aizawl, Champhai leh Indo-Myanmar ramri sumdawnna khaw pawimawh Zokhawthar te, Manipur-ah Churachandpur leh Assam-a Cachar transit corridor te a huam a. Hmun harsa leh zau tak tak ni mah se, department hrang hrang thawhhona tha takin tih tur (Search, enquiries, financial audits) engkim tih hlawhtlin a ni. Mi man/target te zingah tlan bo emaw an thil tih dik lo te thupbo hman tu mah an awm lo hi a hlawhtlinna chu a ni.
5. Agency hrang hrangte chet dan:
(a) Mizoram Police: Operation Trident hnuaiah hian Mizoram Police chuan Assam Police, Manipur Police leh Central Agency te nena tangkawpin Assam leh Manipur hmun hrang hrangah operation a kalpui a, inter-state drug tawlhrukna a inhnamhnawiha rinhlelhte chhuina kal mek ah mi 5 man an ni.
An mi man te chu :
Basanta Doley, Elajyoti Pegu Doley leh Jitu Kalita te chu Guwahati, Assam atanga man an ni a, Paotinmang Haokip leh Nemhoiting Khongsai te chu Churachandpur, Manipur atanga man an ni.
He hlawhtlinna hi ngawrh taka intelligence lakkhawm, (backward and forward linkages) leh sum che vel uluk taka chhuina (financial transaction analysis) leh mi rinhlelh te vil zui reng hnua thleng a ni.
Heng misual te hian an inthlunzawmnaah mawhphurhna hrang hrang – forward emaw backward linkage, sum tihfelna lam buaipuitu, leh drugs phurkualtu leh a hralhna sum insemna buaipuitu te an ni ngei a rinhlelh an ni.
(b) Enforcement Directorate (ED):
Directorate of Enforcement (ED), Aizawl leh Imphal Sub-Zonal Office te chuan Prevention of Money Laundering Act, 2002 (PMLA) Section 17 hnuaiah Aizawl, Champhai leh Lawngtlai (Mizoram) leh Churachandpur (Manipur) hmun hrang hrangah money laundering case pathum-ah hma an la a. He hmalakna-ah hian ED chuan Mizoram leh Manipur a Narco-Trade leh Narco-Hawala Operator te kaihhnawih bank account 1424 an freeze a, Mizoram- a awm Narco-hawala operator te thil neih Rs. Vaibelchhe 17.82 hu provisional attachment an ti bawk. Mi 6 te chu PMLA Section 19 hnuaiah man an ni – pahnih Mizoram-ah, pakhat Gujarat-ah leh pathum Manipur-ah.
Hemi beihpui hian hawala operator, muleaccount neitu, hmaikawr sumdawnna (Front business) leh Champhai, Aizawl, Lawngtlai leh Churachandpur a Mini-ATM counter operator, leh ruihhlo tawlh nana account pawimawh ekawltu bank branch te a huam a ni.
(c) Narcotics Control Bureau:
NCB chuan Mizoram-ah hmun 13-ah he beihpui hi an kalpui a, mi 7 man an ni a, pawisa fai Rs. nuai 12 leh detonator 500 te chu misual kut atanga man a ni. Operation chhung hian Lalduhawma leh Suitei te chu Aizawl-ah man an ni a, Teresa, Lalbiakhluna, Lalliansanga, Pency leh Laltlanzova Pautu te chu Champhai atanga man an ni bawk.
Operation Trident-ah hian state ramri paltlanga inzawm khawmna mumal tak nena drug tawlhrukna beihna kawngah thawhhona, intelligence in share tawnna leh sum chevel uluk taka chhui pawimawhzia a lantir a. Mizoram Police, NCB leh ED te thawhhona tha tak nena chetna hian drug tawlhrukna a inhnamhnawih te chauh ni lo, sum chevel lo buaipui tute leh chumi thlawptu rinhlelh zawng zawng te nasa takin an chetvelna a chhuchat ngeia rin a ni.
Mizoram Police chuan state leh inter-state mai ni lo, international drugs smuggling network te chu intelligence- kaihhruai enforcement ngawrh tak hmanga inter-agency thawhhona nen, drugs kaihhnawih sualna atanga sum hmuh te tihchhiaa beih zel a tum a. A tum ber chu drugs-free Mizoram leh drugs-free India siam a ni.
