2815/2026-2027

Aizawl the 26th October, 2026: Vawiin October ni 26 atangin November ni 1, 2026 chhung hian Vigilance Awareness Week, 2026 chu India ram pumah hman a ni a. Mizoramah pawh vawiin chawhma dar 11 khan Mizoram chhunga office tinah rinawmna thu tiam - Integrity Pledge an chham a ni.

Mizoram Secretariat a thawk officer leh staff te chuan Secretariat Building No.1 kawtah Chief Secretary charge la tu Pu Sudhir Kumar, IAS, Principal Secretary, General Administration Department kaihhruainain Integrity Pledge- rinawmna thutiam an la a. Mizoram puma sawrkar office tina thawktuten Integrity Pledge hi an la a ni.

Central Vigilance Commission bul tumin India ramah kum 2000 atang khan Vigilance Awareness Week hi kum tin hman tan a ni a. India ram tana mi ropui, India rama Deputy Prime Minister leh Home Minister hmasa ber Sardar Vallabhai Patel piancham October 31 chhung khungin, 2000 atang khan Vigilance Awareness Week hi October kar tawp atanga November kar tir chhungin kum tin hman thin a ni. Sardar Vallabhai Patel hi modern All India Services dinchuaktu ah ngaih a ni bawk a, Patron Saint of India’s Civil Servants tiin an ko / vuah hial a ni. Sardar Vallabhai Patel hi mi invawng tak, mi rinawm leh nghet tlat, thil dik leh tha atana dawl mai mai lo a ni a. India ram leh hnam a hmangaihnaah te, a rinawmnaah te, rorelna dik a veina leh a kenkawh kawngah te entawn tlak leh chawimawi ani. Chuvangin he Vigilance Awareness Week hi a piancham chhungkhunga hman a ni.

Vigilance Awareness Week hman tan kum 2000 khan theme / thupui hranpa vuah a ni lo a. Amaherawhchu, Chief Vigilance Commissioner lehkha, June 23, 2000 a a tichhuah hian hetiang hian a sawi a – “Corruption is Anti National, Anti Poor and Anti Economic Development – Eirukna hi ram leh hnam hmelma, retheite rahbeha awm tirtu, miretheite hmelma leh sum lai paia ram hmasawnna dal tu ani.” Hei hi thupui hmasa ber anga ngaih theih a ni.

Tun kum 5 chhunga CVC in Vigilance Awareness Week hman puala thupui a lo siam tawhte chu heng te hi an ni:-
Kum 2022 – Corruption Free India for a Developed Nation: Eirukna tel lo/awmlohna India – Ram leh hnam hmasawn nan.
Kum 2023 – Say No to Corruption, Commit to the Nation: Eirukna hnawl / hawisan la, i Ram tan rinawm inpe rawh.
Kum 2024 – Culture of Integrity for Nations Prosperity – Ram hmasawn nan rinawmna leh dikna vawn tlat.
Kum 2025 – Vigilance: Our Shared Responsibility – Dik leh rinawm tur fimkhur leh invent hi kan zavaia mawphurhna ani.
Kum 2026 – Probity for Prosperity – Hmasawnna leh hnianghnarna to bul chu dikna leh rinawmna a ni.

Mizoram sorkar hnuaia Vigilance Department pawhin he Vigilance Awareness Week, 2026 hman dan tur hmachhawp hrang hrang a siam a. Programme pui ber chu Vanapa Hall ah October ni 28, 2026 Workshop buatsaih tum niin Chief Minister Pu Lalduhoma’n a hman pui dawn a ni. Sorkar hnathawk officers Level 11 & Level 10, Level 12 Officers in Aizawl awm leh College zirlaite -Govt Aizawl College te tel tura beisei an ni. Hriat theih chinah Chief Minister tel a Vigilance Awareness Programme lian tham hetiang a hman hi Mizoram history ah a tum hnihna tur a ni.

He hunah hian a tel zawng zawng ten Central Vigilance Commission in a duan chhuah Rinawmna thuthiam / Integrity Pledge neih ho tur a ni a. Hei bakah hian sawrkar hnathawk zawng zawng tan Online a Integrity Pledge la vek tura hriattirna chu sorkar in a chhuah tawh bawk.

Awareness Gram Sabha hi 31st October 2026 ah buatsaih tura RD & AD ngen an ni tawh bawk a.

Vigilance Department chuan he Vigilance Awareness Week, 2026 pualin 'Probity for Prosperity' tih thupui hmangin Flyer Making Competition a duh apiang tel theihna a buatsaih a. Lawmman hi ni 28.10.2026 a Vanapa Hall-a 'Workshop on observance of Vigilance Awareness Week, 2026' programme hman turah hlan an ni dawn a ni.

He Vigilance Awareness Week, 2026 pual tho hian Mizoram sorkar chuan Walkathon - Vanapa Hall atanga Millennium Centre thleng nei turin ruahmanna a siam bawk a. He walkathon hi Pu Lalduhoma, Chief Minister in a vai liam dawn a ni.