Ni 4 awh “Orientation Training on Integrated Child Protection Scheme”, National Institute of Public Co-operation and Child Development (NIPCCD), Regional Centre, Guwahati leh Social Welfare Department, Government of Mizoram te tangkawpin I&PR Conference Hall-a an buatsaih chu Pi Laldikkimi, Deputy Director, Social Welfare Department chuan vawiin khan a khar.
He training hi District tina Integration Child Protection Scheme (ICPS) staff te, Juvenile Justice Board (JJB) member te leh Child Welfare Committee (CWC) member te tan buatsaih niin mi 52 he training ah hian an tel. Dr. S. Barik leh Ms T. Guite (Faculty, NIPCCD) te bakah Pi Laldikkimi, Deputy Director Social Welfare Department, Pi Zodinthangi, Social Work Teacher, Social Welfare Department Pi Zodinpuii, Superintendent RITC Social Welfare Department, Pu Henry Zodinliana, Asst. Professor, Social Work Dept. MZU, Pu Lalbiakthanga, SP Aizawl, Nl. Lalremruati, Assistant Professor, Aizawl West College leh Pi Angela Ch. Ralte, Secretary CPD ten training an pe. Training hun chhung hian Gan Sabra, Zonuam leh Observation Home, Durtlang te tlawh a ni bawk.
He training-ah hian Juvenile Justice (Care & Protection of Children) Act 2000 chungchang te, naupangte dikna leh chanvo te, naupangte humhim leh venhimnaa mipuite leh police-te mawhphurhna te zirho a nih bakah Juvenile Justice Board (JJB) leh Child Welfare Committee (CWC) te hmalakna hrang hrangte sawiho a ni bawk.
