Vawiin khan Aizawl North II Cluster chhunga NLUP dawngtu chhungkaw 58 hnenah Agarbati fawng siamna khawl 2 theuh leh, chhungkaw 90 hnenah mau Kg 40 theuh sem a ni a. NLUP Nodal Minister Pu H.Liansailova’n Ramhlun North Community Hall-ah NLUP dawngtute hnenah a hlan a ni.

Agarbati fawng siamna khawl sem inkhawm hi NLUP Implementing Board Chairman, Pu R.Selthuama’n a kaihruai a. Minister Pu Liansailova chuan NLUP dawngtute hnenah fuihna thuchah sawiin Mizoram sorkarin kum 20 kal ta a NLUP a kalpui hmasak zawk kha tihtak zeta beitu te chuan din chhuah nan an hmang a, tun thlengin eizawnna ngelnghet an neih phah a. NLUP hmasa zawk khan duh thu a sam tawk lo chungin Mizoram Synod Social Front in an zirchianna atangin 45% velin an hlawhtlin pui a ni, a ti a. Tuna Mizoram sorkarin NLUP a kalpui leh mek chu 80% vel in an hlawhtlin pui theih beisei a ni tih sawiin Pu Liansailova chuan thingtlang khaw hrang hrangah NLUP dawngtu ten thahnem ngai leh tih tak zeta hma an lak dan enin Mizoram sorkar chuan beseina sang tak a nei tih a sawi a. NLUP project kalpui nan central sorkar chuan kum 5 chhung atan cheng vaibelchhe 30000 a rawn pawmpui tih sawiin kum 2 chhungin vaibelchhe 400 dawn a ni tawh, a ti a; Plan sum pawt chawpa kalpui anga sawi thin chu a diklo va ni, a ti bawk. NLUP dawngtu zawng zawng te chu nuai 1 aia tlem lova tanpuina pek vek an nih tur thu sawiin Pu Liansailova chuan tanpuina sum chu a chi atan hman tur a ni tih a sawi a. Patling rilru nei tan chuan cheng nuai 1 chu chhungkaw tana eizawnna din nan a tlem lo va ni, a ti a. NLUP hnuaia Agarbati fawng siam thlangtu te chuan a huhova hma an lak tlan theih nan Self Help Group indin thuai turin a chah a. Sorkar in remchanna a siam sak chu bawhpelh lova, mahni chhungkaw tan leh Mizoram tan hlawhtlin pui ngei turin NLUP dawngtu te chu a chah bawk a ni.

Agarbati fawng siamna khawl hi Rs.45000/- man zel niin a dawngtute hnenah 2 zela sem a ni a. Mau hi Kg 1 Rs.5/- hisapin leitir an ni thung a. An siam chhuah te chu Kg 1 Rs.25 zela leisak leh turin ruahman a ni. Vawiin ah chuan Industries Department hnuaia trade hrang hrang thlangtu chhungkaw 388 hnenah NLUP sum second installment sem nghal a ni a. Sum sem chhuah zawng zawng hi a vaiin Rs.1,87,76,100/- a ni a. Pu John Saikhuma, General Manager, DIC Aizawl chuan technical report pe in Pu J.Hmingthanmawia., Addl. D.C Aizawl chuan lawmthu sawiin hun hnung a khar a ni.