Lunglei-a cham mek Public Accounts Committee (PAC) of Mizoram Legislative Assembly chuan vawiin khan Govt. Lunglei College leh Mizoram Polytechnic, Lunglei an tlawh a; C&AG Report 2009-2010 bawhzuiin H&TE Department hnuaia heng zirna in pahnihah te sum hmandan leh vawnfel dan an enfiah a ni.

PAC Member-te hian Govt. Lunglei College an tlawh hmasa a, College Principal R.Lalrosanga leh staff dang ten an lo hmuakin C&AG Report-a College funds hmandanah thil felhlel awm anga lang chu chipchiar taka sawiho a ni a. PAC Member-ten zawhnate zawtin, Cash Book leh Vouchers te an enfiah a, College hotute insawifiahin tun hnuah fimkhur leh uluk zawka accounting vawn an tum thu Committee an hrilh a ni. Hemi zawha PAC Member ten Mizoram Polytechnic Lunglei an tlawhnaah Principal Er.B.Lalhmuakluaia leh staff ten an lo hmuak a, CAG Report-a an sum hmandan fello lai tarlan chungchang an sawiho a ni.

Govt. Lunglei College leh Mizoram Polytechnic, Lunglei PAC an tlawhnaah PAC Chairman Pu K.Sangthuama chuan hun lo kal zelah fimkhur leh uluk zawka sum vawngfel tura hrilhin Dan dinglai ngai pawimawha, sum cheleknaah fimkhur leh zual turin a hrilh a. H&TE Department hnuaia zirna in hrang hrang an tlawhnaah an harsatna leh accounts an vawn fel tawk lohna chu a inang tlangpui a ni tih Committee hmuhdan a ni tih sawiin Pu K.Sangthuama chuan PAC chuan H&TE Department chhunga Accounts khawihtu staff zawng zawngte tan a huhova financial accounting training neihpui ngei a tul an tih thu a sawi bawk.

Public Accounts Committee Member te chu :

1. Pu K.Sangthuama - Chairman

2. Pu R.L.Pianmawia - Member (Absent)

3. Pu S.Laldingliana - Member

4. Pu Lalrobiaka - Member

5. Pu Lalthanliana - Member

6. Pu Lalruatkima - Member

7. Pu Chalrosanga Ralte - Member an ni.

PAC  tawiawm officials te chu Pu H.Lalrinawma, Jt. Secretary; Pi Lalnunpuii Renthlei, Under Secretary, Pu Lalthlengliana, Committee Officer leh Pi Lalfakzuali Rokhum, FAO, H&TE te an ni.