Vawiin khan Parliamentary Secretary Pu Hmingdailova Khiangte chuan Mizo Students’ Union (MSU) ina college zirlai te tan Inter College Volley Ball Tournamant ‘MSU Cup’ tih a buatsaih kharna programme Tuikual Indoor Stadium-a neih chu khuallian niin a hmanpui.

Pu Hmingdailova Khiangte chuan Sawrkar in thalai te hmakhua ngaihtuahin leh infiamna lama Mizoramin hma kan sawn nan infiamna ruhrel hrang hrangte Mizoram hmun hrang hrangah a siam a, hengte hian Mizo thalaite tan chona thar a a siam a. Tih takzeta infiam miten rilru leh taksa senga an beih chuan Mizo thalaite chuan India aiawhin khawvela huapa inelna ah kan lang thei ang, a ti.

Parliamentary Secretary chuan zirlai te hian an zirna paih bakah infiamna leh insawizawina an mamawh a tiin tunlai khawvelah zirna leh infiamna a kalkawp a tul a ni, a ti. Zirlai naupangte chu an thil tih apiang, zirna lam a ni emaw, infiamna lam a ni emaw, theitawp chhuah turin a fuih a, an mahni leh an nu leh pate tan mi beiseiawm ni turin a chah bawk a ni.

Kharna programme tawite hman zawh hian Final tan nghal a ni a. Hmeichhe Volleyball ah Govt. Hrangbana College chu Champion niin Govt. Aizawl College chu Runners Up an ni a. Champion team hian lawmman pawisa fai cheng 15,000, leh Runner Up Team hian lawmman pawisa fai cheng 10,000 an dawng.

Mipa Volleyball ah Govt. Aizawl College chu Champion niin Govt. Hrangbana College chu Runners Up an ni a. Champion team te hian lawmman pawisa fai cheng 20,000 leh Runner Up Team hian lawmman pawisa fai cheng 15,000 an dawng bawk a ni.