Vawiin chawhnu dar 1:00 khan Pachhunga University College (PUC) leh Environment & Forests Department, Government of Mizoram te tangkawpin an huaihawt - Nungcha / Ramngaw humhalh tulzia inhrilhhriatna (Awareness) chu PUC College Campus ah hman a ni a, Forests Minister PuH.Rohluna leh Sports Minister Pu Zodintluanga ten an hmanpui.
E&F Minister Pu H.Rohluna chuan Aizawl khawpui tawt tak kara, mipui tana ro hlu tak PUC ten ramngaw zau tak tha taka an humhalh thei chu lawmthu a hrilh a, ramngaw kan tihchereu nasat avanga Mizoram ramngaw a zim sawt zia te sawiin boruak inthlakthleng leh ruah tlak dan mumal ta lo lutuk te hian boruak siamthat tura thing phun leh ramngaw humhalh a tulzia a tilang a ni, a ti. Kangmei venna kawnga uar lehzuala hmalak a pawimawh thu sawiin Pu Rohluna chuan kum tam tak uluk taka enkawl ramngaw te pawh minute khat lekah kangmei chuan a tichhe vek thei a ni tih hriain mitin tan la tlang turin a sawm. Kan ramngaw leh nungcha te kan humhalh that loh chuan thangthar te tan ram luah tlak lovah kan siam ang tih a hlauhawm a ni, a ti.
Sports Minister Pu Zodintluanga chuan zirna hmun tha leh hriat hlawh, ram leh hnam tana mi tangkai leh mithiam chherchhuaktu a nih avanga PUC chu chhuanawm a tih thu a sawi a, thingkung nuai 5/6 lai an enkawl thei chu fakawm tiin Mizoram pum tan entawntlak ni-a a hriat thu a tarlang. Mizo ten sorkar thil mahni ta anga kan en thei lo leh mahni ta ni lo chu chhe vek mahse pawi tihna neilo rilru kan pu tlat thin chu zahthlak tiin kan in siamthat hle a tul a ni, a ti.
Ecological Conservation Awareness Programme hi PUC Principal Dr. Tawnenga’n a kaihruai a, PUC tihchangtlunna tura kawng hrang hranga hmalak mekna te a tarlang a, PUC hmasawnna tura Minister pahnih te chuan duhsak taka hma an lakpuina ah lawmthu a sawi.
Dr H.Lalruatsanga, Asst. Professor, Botany Dept., PUC chuan nungcha leh ramngaw humhalh kawnga PUC hmalakna te sawiin chumi kawnga tan lakpui turin mipui a sawm a. PUC ram, tin 100 vela zauvah ramngaw tin 70/80 vel a nih thu te, thing nuai 5/6 vel a awm thu te leh chu chuan kum khatah boruak thianghlim thahnem tak a siamchhuah dan te a sawifiah a, PUC ramngaw chu Aizawl khawpui boruak thianghlima chawmtu ber a nih thu te leh a humhalh kawngah pawh theihtawpa tan lakpui turin mitin an ngen a ni. PUC ram chhungah hian thing chi hrang hrang - theirah te, ramhmul damdawi te, pangpar leh mau chi hrang hrang te a awm a, sava chi hrang hrang te an fuan khawm thin a ni.
Ecological Conservation Awareness Programme ah hian Dr. R. Lalthangliana, MLA, Pu Lalchamliana, Ex-Speaker , Dr. Lalzama, Ex -Minister Dr. J.V. Hluna Ex-MLA te pawh an tel a ni.
