Thenzawl leh a chhehvel khua ten kawlphetha mumal zawka an dawn theih na tur atana siam 33 KV Grid Sub-station chu vawiin chhun khan Mizoram Chief Minister Pu Lal Thanhawla\\\'n a hawng.

Vawiina power sub-station hawnna inkhawmah hian Chief Minister Pu Lal Thanhawla chuan 33 KV Grid Sub-Station thar hawn a ni ta chu Thenzawl tan rahbi pawimawh tak a ni a ti a, Thenzawl khua chu khaw hmun rem leh hmasawnna hna kalpuina tur atana duhthusam ani tih hriain sawrkarin theihtawp chhuahin hmasawnna kalpui a tum a ni a ti a, Thenzawlah hian International standard Golf Course siam tura hma lak mek a nih thu te sawiin, UD&PA Department kaltlangin intihhlimna hmun (amusement park) changkang tak siam tura DPR buatsaih mek a nih thute leh Private University changtlung tak din tura hmalak duh an awm thu te a sawi a, heng te hi Thenzawl khua in a chhawr tangkai theih nan mipuite pawhin rilru zau tak put a tul thu te leh khawtlang hruaitute leh mipuiten hun hma lam hun thui tak thlir chunga ngaihtuahna seng turin a chah bawk a ni.

33kV Sub-station Thenzawl hi Annual Plan 2009-2010 chhung a siam tura ruahman a ni a, Thenzawl leh a chhehvel khua ten kawlphetha (power supply) tha zawk leh changtlung zawk an neih theih nana siam a ni. He hna hi Accelerated Power Development Reforms Programme (APDRP) scheme hnuaia thawh niin, sub-station siam na tura pawisa ruahman zat (estimated cost) chu cheng nuaih 221.44 a ni. power sub-station hmun laihzawl (site leveling) hi kum 2010 February atanga tan a ni.

33KV Sub-Station Thenzawlah hian 1x1.6MVA, 33/11 KV Transformer bun a ni a, 11KV feeder pathum a awm bawk a, heng zinga pahnih hi Thenzawl khawchhung kawlphetha a chawm tu tur a ni a, pakhat hi Thenzawl bul khua Buangpui, Neihloh leh Vety farm te chawmtu tur a ni. Kawlphetha hi direct a 132KV Sub Station Bukpui atanga pek a ni a a, Kau-Tlabung Small Hydel Project atang pawhin direct in kawlphetha supply hi a dawng thei bawk a ni.

Chief Minister tawiawm tu Pu P.C.Lalthanliana, Social Welfare Minister pawhin thusawiin Thenzawl khua hmasawnna atana sawrkar thahnemngaihna leh ruahmanna te tihhlawhtlingtu ni turin mipui kalkhawmte a fuih bawk a ni.

Vawiin Sub Station hawn inkhawm hi Er. C.L.Thangliana, Engineer-in-Chief, P&E Departmenti i\\\'n a kaihruai a, Er. J.H.Malsawma, Executive Engineer, Serchhip Power Division hnen atangin Technical report ngaihthlak a ni a, Er. L. Pachuau, Chief Engineer, Distribution, P&E Department in lawmthu sawiin hun a khar a ni.

Chief Minister hi a nupui Pi Lal Rilianin tawiawmin, Serchhip D.C. Pu P.Lalchhuanga MCS, S.P Pu Milind Dumbere IPS leh Serchhip District chhunga sawrkar pisa Head of Department te an tel kim hle a ni.