646/2023-2024

Aizawl, the 1st June 2023 : Vawiin khan Information Minister Pu Lalruatkima chuan Pachhunga University College, Political Science Department buatsaih ‘National Seminar on Navigating G20s Presidency: Strategizing India’s Leadership’chu a hawng a. Hawnna inkhawm hi PUC Seminar Hall-ah neih a ni.

Pu Lalruatkima chuan India ramin G20 President nihna a chelh chhungin kawng hrang hrangin hma a la a. A hmalak tum dan ruahmanna fel tak siamin khawvel ram hrang hrang economy rualkhai zawka a kal theih nan te, khawvel ram dang te nena insumdawn tawn dan mumal zawk leh intluktlang zawka a kal theih nan te, tun lai thiamna digital leh technology hmanga economy chawisan kawngah te, economy tlakchhiatna laka invenna regulatory framework tihchangtlun te, ram thenawm te nena thawhhona tha zawk neih te, retheihna umbo te, hriselna kawnga tan lak te, sik leh sa danglam zelah kan chenna khawvel boruak tihthianghlim kawnga tan lak te chu a ngaih pawimawh zual zingah a tel a ni, Minister chuan a ti.

Aizawl khawpuiah ngei G20 Forum chhungah Business 20 (B20) Aizawla hlawhtling taka nghah a nih chungchang pawh sawilangin Pu Lalruatkima chuan ram chhung hmun dangte leh ram dang atanga lo kal mithiam rual ten an tawnhriat atang tein thil tam tak ram mipuite min hrilh a, kan hriat loh tam tak kan hriat belh, a ti a. Sumdawng lian tak tak ten Mizoram chhunga an sum leh pai an peipun theihna tur kawng pawimawh tak nia a hriat thu a sawi a. Act East Policy avanga Mizoram chhim lam kawtchhuaha ram dangte nen insumdawn tawnna tur ruahmanna siam mek pawh nasa taka hma sawn zelin, a dawngsawng tu tur Mizoram mipui te kan inpeih a ngai, Pu Lalruatkima chuan a ti. Kan khawtlanga sumdawng lian te an lo luh hunah Mizo mipui ten tangkai taka kan chhawr ve theih nan kan inbuatsaih a ngai a, khawvel hmasawn ruala hma kan sawn ve theih nan kan thiamna tihpun a ngai, a ti a. Social media buaipui nasa Mizo thalaite hian thutak rintlak leh belhchhian dawl kan hriat tam a tul tih sawiin social media chu kawtlai titi chauh a ni tih hria a, lehkhabu tha leh chanchinbu te chhiar tam turin kalkhawm te a fuih a ni.

Keynote address sawitu Pi Feli Visco, Deputy Head, IT and Sustainable Cities, Embassy of France India chuan G20 nihphung sawiin India ramin President dinhmun a luah chhung hian ram ei leh bar dinhmun siam that dan kawngah te, khawvel ram hrang hrangten harsatna leh chona kan hmachhawn dan turah a ngaihdan thawh chungchangah te, India ramin a vei leh ngaih pawimawh a tarlan theihna tur remchang a ni, a ti a. G20 President a nihna hi India chuan a la thutak hle a, ram ropui leh pawimawh a nihzia phochhuahna dawhsan pawimawh tak a ni, a ti.

G20 hi kum 1999 khan din tan niin ram hrang hrang 19 leh European Union ram te an tel a. Kuminah hian India ram chuan President nihna changin ram chhung khawpui 55 ah meeting vawi 200 a huaihawt dawn a ni. Aizawl khawpuiah pawh B-20 hlawhtling taka neih a lo ni tawh a. Pachhunga University College Political Science Department chuan India ramin President nihna a chelh tangkaina zirchian nan ni hnih awh National Seminar a buatsaih a. Mi thiam engemawzatin thupui thlan bik hmangin thu an sawi dawn a ni.

Hawnna inkhawmah hian Minister Pu Lalruatkima chuan PUC Directory a tlangzarh nghal a. Pachhunga University College Principal Prof. H.Lalthanzara’n thu a sawi bawk a ni.