Pachhunga University College chuan vawiin khan an college campus-ah zirlai kalchhuak turte pual zanriah 'Graduation Dinner'  buatsaihin, zirlai 515 te an thlah.

Kumtina zirlai kalchhuak turte puala an buatsaih thin 'Grad Dinner 2015' hi an college basketball court-a pandal sakah an hmang a, kumin hian zirlai kalchhuak tur (graduating students) 515 awmin, heng zingah hian Arts zirlai 303, Science zirlai 175 leh Commerce zirlai 39 an awm a ni.

Zirlai kalchhuak turte puala zanriah buatsaih hma hian inkhawm tawite hman a ni a, hetah hian PU College Principal Dr. Tawnenga chuan zirlaite fuihna thu sawiin, kum thum (3) zet Pachhunga University College an kal hnua degree ropui tak nena college an chhuahsan thei tur chu a lawmpui thu a sawi a. BA, BSc, B.Com degree neih chu a tawpna tur mai ni lovin, chona leh mawhphurhna nasa zawk an la hmachhawn dawn chauh tih a hrilh a, "A eng lam kawng chauh ngaihtuah a, rinawm taka engkim ti tur leh dikna dinchhuahpui a, midangte tana tangkai tak ni zel turin ka duh che u a ni," a ti. A sawi zelnaah Dr. Tawnenga chuan, zirlaite chu zirna sang zawk an zir hunah pawh hnung lama an thil tih dik tawk loh te theihnghilh a, hma lam pan tura theih tawp chhuah turin a fuih a, "Eng hunah pawh PU College chhungkaw zinga mi in nih theihnghilh lo ula, in hlawhtlinna pawh hriatpui zel che u kan duh a ni," a ti a. Zirlai te hmasawnna tur leh an hlawhtlin hun tur chu an thlir reng thu sawiin, 'In kal zelnaah duhsakna ka hlan che u a ni," a ti bawk.

Zirlai te tan zanriah buatsaih inkhawm hi Pu HS Lalsangpuia, Associate Professor, Department of History, Grad Dinnar Organising Committee Chairman ni bawk chuan a kaihruai a, Dr. Lalbiaksangi Chawngthu, Associate Professor, Department of English chuan zirlai kalchhuak turte thlahna thu sawiin, zirlai kalchhuak turte aiawhin Lalliankima, Department of Philosophy chuan thu a sawi a, Upa R.Lalmalsawma, PU College Alumni Association hruaitu chuan lawmpuina thu a sawi bawk.

Pachhunga University College hian zirlai thiam thei te leh dawnkan ngaite tan scholarship hrang hrang an nei a. Physics, Mathematics leh Chemistry zirlai pathum te tan SEL Foundation (Sunflower Electronics) te chuan thlatin scholarship Rs. 1500 an pek a, Zoram Educational Trust (ZET) chuan physics zirlai pakhat tan thlatin Rs. 1000 an pe bawk. BA exama titha ber tan HK Bawihchhuaka Award, Rs. 10,000 leh trophy; B.Sc ti tha ber tan Dr. H.Lallungmuana Award, Rs. 10,000 leh trophy te pek thin a ni.

Attachment

  • Loading attachment...