Vawiin chawhnu dar 1:00 khan Pachhunga University College Teachers’ Association (PUCTA) chuan an College Seminar Hall ah voluntary retirement a zirtirtu hna chawlhsan tu Minister pahnih Pu Lalchamliana, Associate Professor, Department of Political Science leh Dr. R.Lalthangliana, Associate Professor, Department of Sociology te thlahna hun an hmang.

Thlahna hun hi PUCTA President Dr. K. Lalchhandama’n kaihruaiin Dr. Zoramdinthara, PUCTA Secretary-in an chanchin sawina hun a hmang a, Dr. Tawnenga, Principal in thlahna thu sawiin zirtirtu tha tak tak pahnihin an College an chawlhsan a ngai ta chu a ui thu a sawi a, anni pahnih thawhpuina avangin PUC tan hmasawnna leh thilpawimawh tak tak tihhlawhtlin ani a, hetianga Cabinet Minister dinhmun hial an chelh ta hi Pathian remruat ngei anih thu sawiin an hmalam hun zel atan duhsakna a hlan a ni. Zirtirtu aiawhin Dr. H.S. Thapa chuan thu a sawin, PUCTA hian Pu lalchamliana leh Dr. R.Lalthangliana te hi ngaihhruina thilpek an hlan bawk a ni.

Pu Lalchamliana, Home Minister chuan zirtirtu hna hi a thawh atana a thlan nimahse zirtirtu nih reng a la duhlaiin ram leh hnam tana mawhphurhna sang zawk chelh a ngaih tak si avangin hreh tak chungin PUC a chhuahsan a ngai ta a ni a ti a, zirtirtu hna zahawm tak thawk ve theia a awm avangin vannei a intih thu a sawilang bawk. Zirtirtu tha ber ni a a inhriatloh thu sawiin theihtawp erawh a chhuah thin tih a sawi a ni.

Dr. R.Lalthangliana, Higher& Technical Education Minister pawhijn thu sawiin a hunk al tawh a PUC zirtirtu ani chu lawmawm a tih thu a sawi a. Thawhpui tha tak tak te leh zirlaite avanga tun dinhmun a thleng thei chu lawmawm a tih thu a sawi bawk. PUC a thawh chhung a thil hrang hrang a tawnhriat leh a thawh vet e chuan ram rawngbawlna ah pawh kang tam takin a tanpui nasa hle tih sawiin PUC chuan hma a sawn zel theih nan duhsakna a hlan a ni.

Pu Lalchamliana hian kum 1984 khan PUC ah hian Lecturer hna a zawm a, a pension thleng hian thawkin Department of Political Science ah Associate Professor leh Head of Department anih laiin a hna hi a chawlhsan ta a ni.

Dr. R.Lalthangliana hian kum 1985 April ni 9 ah PUC ah hian Lecturer hna zawmin Associate Professor, Department of Sociology atangin a hna hi a chawlhsan a ni.

PUCTA bakah hian Mizo Teachers’ Welfare Committee (MTWC), Pachhunga University College te pawhin vawiin chawhnu dar 2:30 khan Pu Lalchamliana leh Dr. R. Lalthangliana te thlahna hun hi a hranin an buatsaih leh a, hemi rual hian PUC zirtirtute zing atanga MLA tling thar Pu Lalchamliana, Dr. R. Lalthangliana, Pu L.Thangmawia, Dr. Vanlalthlana leh Dr. Vanlaltanpuia te lawmpuina hun ruai nen an hmang bawk a ni.