Nimin khan Pu Lalrintluanga Sailo, Deputy Govt Chief Whip, Dampa bialtu MLA ni bawk chuan Reiek khua-a Bio-diversity hmun, Association for Environment Preservation (ASEP) leh YMA Reiek Branch-te siam chu a hawng. Bialtu MLA hian a bial chhung khaw hrang hrang West Lungdar, Khawrihnim, Hreichuk, Lungphun leh Kanghmun khuate tlawh chhunzawmin Khawrihnim MUP Unit-te hian an bialtu MLA chu an ngaihsanzia lantir nan an nupa-in an zawn a ni.

Nimina a bial tlawh khawtinte hi bialtu MLA hian Primary School sak that nan cheng Nuai 4 theuh a pe a. Hreichuk - Lungphun khua chu vote percentage a hmuh thatna anih avangin Model Village-a puan thuai anih dawn thu a sawi bawk.

Lungphun khuaah Anganwadi pahnih sak thatna tur cheng Nuai 4 a pe a. Kanghmun khua PHC tlawhin an harsatnate a hmunah a enpui bakah Kanghmun VC-te hian MLA hi in hmun an lo pe a ni. Vawiin hian Bawlte, S. Sabual, Darlung, Bawngthah khuate a tlawh chhunzawm a. Bialtu MLA hian bial chhung khua a tlawh zawng zawngte tan hian CDPO kaltlangin naupangte enkawlna tur Anganwadi sak that nan Cheng Nuai 2 theuh pek an nih dawn thu a sawi.

Bialtu MLA hian Darlung Middle School sak that nan Cheng Nuai 4 a pe a. Presbyterian English School-te hman turin Computer Set a pe bawk. Darlung khuate chuan District Headquarter ber tlawhpawh tura District dang kan a ngai chu hreawm an tih thu leh District Hqrs awlsam taka an tlawhpawh theihna tura hmalaksak turin MLA hi an lo ngen a ni.

Pu Lalrintluanga Sailo, Dampa bialtu MLA chuan a bial chhunga School-te chu an mamawh leh harsatnate sukiang tura mawh a lak tur thu sawiin zirtirtu indaih lohna phuhruk nan zirtirtu MR in mi 1000 vel lak a nih dawn thu a sawi a. Result tha tak an neih erawh a beisei thu a sawi. SEDP kaltlanga tanpuina chu a bial chhunga a mamawhtute zawng zawng tana pek an nih dawn thu a sawi a. Party inthliarna a awm dawn loh thu sawiin amaherawhchu tanpuina dawngtute'n anihna ang taka an hmang lo anih chuan 2nd Instalment an hmuh dawn loh thu a sawi.

Bial mipuite chu thawhhona tha tak hnuaia kal tlang turin a sawm a. Amah hmu tura Aizawla hun leh sum tam tak senga kal ai chuan an harsatna leh an mamawhte Phone kaltlang pawha thlen mai thin turin a hrilh a. Bial mipui tana tangkai taka a thawh theih nana tawngtaipui thin turin a ngen bawk a ni.