Mizoram Excise & Narcotics Service Association (MENSA) chuan vawiin khan Commissionerate of Excise & Narcotics  Conference Hall-ah General Conference vawi 16-na an hmang a. He hunah hian Excise & Narcotics Minister Dr.K.Beichhua chu Khuallian niin Excise & Narcotics Commissioner Pu Ngurchungnunga Sailo chu Khualzahawm a ni.

MENSA Conference hawnna inkhawm an President Pu Lalchansanga Sailo kaihhruaiah Khuallian Dr.K.Beichhua chuan sorkar chuan zu leh ruihhlo do hi a ngaih pawimawh berte zingah a nei chho dawn a, Cabinet an thutkhawm pawhin Chief Minister berin hmasawnna kaihhnawih thildang aiin a sawi hmasak zawk chu ruihhlo do chungchang hi a ni, a ti. Sorkar kumthar April thla atang chuan ruihhlo do chu sorkar hmalakna pawimawh tak a nih dawn avangin Excise & Narcotics Department chu an pawimawh hle dawn a, hei hi sorkar hna satliah anga ngai lovin ram leh hnam chhanchhuahna hna, Pathian rawngbawlna anga ngai turin END officers and staff zawng zawngte chu taksa leh rilrua inbuatsaih lawk a ngai a ni tiin a fuih bawk. Mizoram khawtlang nunphung enkawltu an nih thu sawiin Minister chuan Prohibition kenkawh chu thil harsa leh mawhphurhna rit tak a ni dawn tih hriat sa a ni a; kohhran, NGO leh political party te dem hlawh ber tur, an pet kual ‘ball’ ber tur chu Excise & narctics Department hi a ni leh dawn a; he department changtu Minister a nih angin amah ngei pawhin a rilru a inbuatsaih tawh angin department-a thawk zawng zawngte pawh taksa leh rilruah lo inla ‘fit’ turin a chah a ni. Vawiina Mizoram chhunga mimal, chhungkua, khawtlang dinhmun ngaihtuah hian a lungawithlak tawh lo hle a, zu leh ruihhlo do tura tuna Excise & Narcotics Department hnuaia thawktu mi 300 velin an enkawl zo dawn loh avangin a theih anga rangin post ruakte hnawh khah vek tum a ni tih sawiin Dr.K.Beichhua chuan heng post luah turin ruihhlo laka ram leh hnam chhanchhuah hna thawk duh Mizo thalaite lo inpeih turin a chah a ni. Ram dang, state dangin ralthuamin kan thalaite an bei lo, an hmanrua chu zu leh drugs zawk a ni tiin Minister chuan ruihhlo do kawngah sorkar chuan kohhran leh CYMA te pawh a thawhpui dawn a, chuvangin tumah zam lovin, hnehna chang ngei turin sorkar, kohhran leh NGO ten beihpui thlakho a ni ang a ti.

Khual zahawm Excise Commissioner Pu Ngurchungnunga sailo pawhin thusawiin  sorkar chuan Prohibition Dan tihdanglama kalpui a tum a, chuvangin Excise Department hnuaia thawk zawng zawngte chu an pawimawh lehzual dawn a, District lama post zawng zawngte pawh taksa leh rilruin lo inbuatsaih lawk a ngai a ni a ti. Excise & Narcotics Department hnathawk zawng zawngte chu an hna tha taka an thawh theih nana mahni hriselna ngai pawimawh turin a chah bawk.

Excise & Narcotics Department hnuaiah hian post awm zawng zawng  chu 515 a ni a, chunga zingah post 119 a ruak a ni. Tuna thawk mekte bakah CTI, Sesawngah Training nei mek mi 50 an awm bawk.