Pachhunga University College (Constituent College of Mizoram University) chuan vawiin khan an college atanga Degree Examination-a zirlai tithate chu MZU Multipurpose Hall-ah chawimawina an hlan.

He lawmpuina inkhawm (felicitation programme) hi Mizoram University Vice Chancellor, Prof. R.Lalthantluanga chuan khuallian niin a hmanpui a, Pachhunga University College chu constituent college awmchhun a nih bakah result neih that kawngah te, zirtirtu thiamna lamah te an chhuanawm thu sawiin, zirtirtute chu India ram college tha dang te el phak turin researh beih kawngah tan la zel turin a fuih a ni.

July ni 10-a Mizoram University-in Under Graduate-a semester a hman hnua zirlai chhuak hmasa ber te result-a tihchhuah-ah khan, Arts stream-ah rank holder 99 awmin chung zinga 52 chu PU college zirlaite an ni a. Science stream-ah rank holder 52 awm zinga 40 chu PU college an ni bawk.

Kumin result chhuakah khan PU College atang hian Arts-ah exam beitu 296 zinga 226 (76.35%) chu an pass a, heng zingah hian first division-ah 115, second division-ah 106 leh third division-ah 6 an pass a ni. Science stream-ah exam beitu 144 awmin mi 87 (60.41%) an pass a, pass zinga 79 chu first division-ah an pass a, mi 11 chu second division-ah pass-in third division-a pass an awm lo. Commerce stream-ah exam beitu 48 zinga 31 (64.58%) an hlawhtling a, heng zinga 8 hi first division-ah pass in 19 chu second division-ah an pass a, third division-a pass 4 an awm bawk. PU college atanga zirlai pass thar 344 zingah hian zirlai 202 (58.7%) zet chu first division-ah an pass a ni.

Zirlai pass chhuak thar te lawmpuina (felicitation programme-ah hian) he college atanga Arts subject-a mark hmu sang ber, Jerry Lalmuansanga, Political Science department hnenah HK Bawihchhuaka Award hlan a ni a. Science subject-a mark hmu sang ber Aloys Lalchunglura, Physics department hnenah Dr. H.Lallungmuana Award hlan a ni bawk. Heng Award te hian chawimawina thu ziak (citation) leh tangka fai Rs. 10,000 a keng tel a ni.

Mizorama college upa ber leh lian ber PU college-ah hian kuminah zirlai lut thar 870 an awm a, an vaiin zirlai 2012 an awm mek. Tun session atanga BA (Mathematics) hawn thar nen department 21 awmin zirtirtu 100 chuang an awm mek bawk a ni.

He chawimawina hun hi Mizoram University Registrar, Mr. C.Zothankhuma, IDAS leh MZU College Development Council Director, Shri S. K. Ghosh te chuan an hmanpui bawk a, college zirtirtu leh zirlaite an kal tha hle a ni.