Vawiin khan Pu Lal Thanzara, Health & Family Welfare Minister hovin Mizoram Environment & Forest Consultative Forum (MEFCOF) hruaitute nen Mizoram hmun hrang hranga Zotheihuan tihhmasawn dan tur ngaihtuahin an thukhawm.

He sawihona ah hian MEFCOF chuan Mizoram khaw hrang hrang 45 ah Zotheihuan hi neiin ram zau zawng hi a vaiin 1860 Sq.kms a nih thu tarlan a ni a, hemi enkawl tur hian a ram neitu VCP te kaihhruaina hnuaiah NGO pawl hrang hrangte telna Zotheihuan Coordination Committee din a nih thu tarlan a ni bawk.

Zotheihuan enkawlnaah hian mimal tha leh sum tam tak sen a ni tawh in enkawl zel tur hian sum tam tak a ngai a, chhawm nun zelna tura sum mamawh a nih thu te, tunah hian NEC lamah dilna an thehluh mek thu te sawilan a ni in, Minister chuan an mamawh te chu hriain hmalakpui a tum thu a hrilh a. Sawrkar leh Forest Department kuta innghah thiam a tul thu a sawi bawk.

Ramngaw humhalh nana pawimawh tak ram kang ven hna hi kum tin Zotheihuan Coordination Committee chuan hmun hrang hrangah a thawk thin a, Durtlang kham Zotheihuan kan lohna tura veng tur pawh hian Mei-sipai pawh kum tin MEFCOF hian a ruai thin a ni. Hmalakna a chak zawk theih nana Forest Department hnuaia Fire Prevention Committee ah MEFCOF telh tura ngenna thlen nise an ti bawk a ni.