Vawiin khan Mualthuam ‘N’-ah Mizo Upa Pawl din champha lawmna neih a ni a, Social Welfare Minister leh bialtu MLA ni bawk Pu PC Lalthanliana chu Khuallian niin ‘MUP Day’ hi a hmanpui a ni.

MUP Day lawmna inkhawm an President Pu Thangtawna kaihhruaiah Minister Pu P.C. Lalthanliana chuan MUP chu upate engthawl taka an inkawmkhawm theihna pawl awhawm tak a ni tiin, mawi taka par vul zel turin Mualthuam MUP-te chu duhsakna a hlan a. Sorkar chuan upate hamthatna tur a ngaihtuah reng a, Lunglei-ah pawh chawmtu neilote tan ‘Old Age Home’ sak tura ruahman mek a nih bakah damdawiinah pawh upate chawlh hahdamna ngaihtuah sak tura hmalak mek a ni bawk, a ti. Khawtlang nunah pawh upate chu ralbang thei an ni bik lova, thangtharte kalzel dan turah fuihna thu hrilh leh thurawn pek hi an tih fo tur a ni zawk, a ti.

Thu a sawi zelnaaah Minister Pu P.C. Lalthanliana chuan Mualthuam ‘N’ ah kudam leh staff quarter te pawh sak a nih tur thu leh Mualthuam’N’, Haulawng leh khaw thenawm ten tui hniarhnang zawka an dawn theih nan Vanva lui atangin tui lakchhuah dan tur ngaihtuah mek a ni, a ti a. Mualthuam leh Haulawng tlangdunga kuthnathawktute thlai tharchhuah man zawka hralhchhuah theih nan ‘Centre of Excellence’ Saichho-ah bultan tum a ni bawk a. He project atan hian cheng vaibelchhe 5 ruahman a ni tawh a, a hmun tur erawh chu khawtlangin an pek tur a ni ang, a ti. Khuallian hian Mualthuam MUP Day lawmpui nan dekchi 2 leh no dozen 4 bakah vawiina an ruaithehna tur a tumsak bawk a ni.

Minister tawiawmtu a nupui Pi Z.D.Lalnunziri chuan Mualthuam ‘N’ khuaa Golden Jubilee lawm thei nupa tuak 1 leh Silver Jubilee lawm pha nupa tuak 3 te hnenah Lawmpuina Certificate a hlan bawk a ni.

Mualthuam ‘N’ ah hian MUP member mipa 64 leh hmeichhia 64 an awm mek a ni.