Vawiin chawhma dar 11.00 khan Govt. Kolasib College chuan Diakkawn YMA Hall-ah kumina an college-a zirlai lut thar turte lawmna inkhawm, Freshers’ Social an hmang a; he hun hi Pu Jitender Yadav, Deputy Commissioner chuan a hmanpui.

Pu Jitender Yadav chuan zirlai thar turte chu college-a kum thum an zir hun chhung chu hlim tak leh nuam ti taka hmang turin duhsakna a hlan a, “School leh college kalphung leh nunzia hi a danglam a, college-a kum thum hun tha kan neih chhung hian nakina eizawnna atana kan kawngzawh tura kan thlan lamah kan rilru kan sawhngheh sauh sauh a tul a. Zirna lama a thiam thei pawl kan nih loh pawhin, rimawi te, infiamna leh kawng chi danga thiambikna kan neih te chu BA pass ruala eizawnna atana hmang thei tura kan inchherhriam a pawimawh a ni” a ti. Govt. Kolasib College-in Freshers’ Social a buatsaih chu lawmawm a tih thu DC Pu Jitender Yadav chuan sawiin, “Hetiang hun hi zirlai tharte leh a lo lut tawh te inkara inpawhna siamtu a ni a, zirlai tharte tan chuan kum thum lo awm leh tur chhunga kan theihna zawng zawng hlan tura inpekna hun a ni” tiin, zirlaite chu Kolasib District leh Mizoram tihmingthatu ni turin a fuih a ni.

Govt. Kolasib College-ah hian kuminah zirlai thar 157 an awm a; zir mek zingah BA IIIrd semester zirlai 91, Vth sem. zirlai 81 te; B.Sc. IIIrd sem. 11, Vth sem. 11 leh BCA IIIrd sem. 2, Vth sem 9 an awm a, zirlai zawng zawng hi 398 an ni. Lecturer 31 awmin, contract lecturer 8 leh part-time lecturer 11 an awm a ni. Kumina Mizoram University-in result a tihchhuah takah khan Govt. Kolasib college atang hian BA 52.17 % an passed a, B.Sc. 70 % an passed bakah Zoology-ah 10th position te, BA-ah Geography- 8th position leh Political Science-ah 8-na te an hauh a ni.

Vawiina freshers’ social hi Students’ Union Vice-President F. Lalrempuia’n a kaihruai a, hun hlimawm tak an hmang a ni.