Higher & Technical Education Minister Pu R.Romawia chuan vawiin khan Govt. J.Thankima College Students’ Union buatsaih zirlai kai tharte lawmna inkhawm chu Vanapa Hall-ah a hmanpui.

Pu R.Romawia chuan zirlai thiam thei leh titha te chauh thlang lova, thiam thei lo leh hlawhtling tura beisei loh ten beiseina thar an chharchhuahna hmun J.Thankima College hi a chhuanawm hle a ni, a ti. Mizote hi hnam intodelh, thenawmte thil neih zen lova mahni ke ngei a din tum mi kan nih thin kha theihnghilhin thawk lova ei hmuh tum, sorkar atanga sum hmuh dan ringawt zawnga phi buai kan tam ta hi a lungchhiatthlak a. Mizo hnamin work culture tha tak kan neih thin kha chhawm nun leh a ngai a ni, a ti a. Govt. J.Thankima College zirlaite zingah mahni inchawm a, inhlawfa chunga lehkhazir an awm chu a lawmawm hle a, zirlai dangte leh mipui mimir tan chona ropui tak a ni, a ti. Minister chuan college admission changlo zirlai engemawzat an awm avangin College Principal te hnenah zirtirtu leh classroom-in a zawh tawk bak thlenga in pawt fan tura ngenin, zirlai engemawzat admit belh an ni a. Zirlai kai tharte’n hei hi hria a, theihtawp chhuaha taima taka an zirlaite zir turin a chah a. An nu leh pa te, an zirtirtute leh ramin a beisei ang taka thawhrimna nen, chhawrtlak thiamna pawchhuah ngei turin Higher & Technical Education Minister chuan a fuih a ni.

An college Principal Pu Ramhmangaiha Ralte pawhin thu sawiin HSSLC pass chhuakte chu tumah thliar lovin, eng dinhmunah pawh ding se, a kal hmasa apiang duhsakin an lo admit zel thu a sawi a, zirna in tha chu a thiamte thiam tir piah lamah a thiam lote thiam tir a, hmantlaka chherchhuahna hmun a ni, a ti. Zirna hmasawnna ngaihtuah vanga sorkar hmalakna angin an College building tur pawh Bawngkawn-a Brigade hmunah sak thuai a nih tur thu leh mipa hostel leh indoor stadium pawh sorkar hmalaknaa sak a nih thuai a beisei thu a sawi bawk.

Govt.J.thankima College-ah hian kumin hian zirlai kai thar 360 an awm a, an vaiin zirlai zawng zawng 847 an ni. Mizoram University hnuaia degree exam result chhuak hnuhnung berah zirlai First Class-a pass paruk an awm a, chung zingah chuan Mizo subject-ah Lalhmachhuani 5-na a ni a, History subject-ah Thangsangzela chu 7-na a ni. Heng zirlai titha te bakah hian Wrestling Federation of India buatsaih National Cadet Wrestling championship, Srinagar-a neih zawh taka bronze medal dawngtu F.Lalmalsawmi, III Semester BA leh 8th Statistics Day puala Economics and Statistics Department-in debate intihsiak a buatsaiha an college aiawha lawmman pakhatna dawngtu Lalrawngbawla, R.Lalchhanchhuaha leh Lalhmangaihsanga te hnenah lawmpuina thuziak Minister hian a hlan nghal a. An college annual magazine ‘Chawngpereng’ a tlangzarh bawk.