2840/2022-2023

Champhai, the 28th November, 2022: Vawiin chawhma dar 10 khan Centrally Sponsored Project for Computerisation of Primary Agricultural Credit Society (PACS) kalpui dan tur  chungchanga hmalak dan tur ngaihtuahin District Level Implementation and Monitoring Committee (DLIMC) chu an Chairman Pu James Lalrinchhana, District Bawrhsap hovin DC Conference Hall-ah an thukhawm.

Pu James Lalrinchhana chuan Sawrkar laipui project pawimawh tak kaltlanga PACS hrang hrangte mumal leh felfai zawka computer leh hmanraw changtlung zawka thuamthat tum a ni chu lawmawm a tih thu a sawi a. Dai ngai loh leh thil tharte chu huphurh mai lova rilru inhawng leh phur taka ngaihven a pawimawh thin thu sawiin, kalphung thar tunlai thiamna hmanga tanlakna chuan PACS te ah hmasawnna, inenkawlna tha zawk, changtlung leh langtlang a thlen ngei a beisei thu a sawi a. India ram puma kalpui tur anih thu pawh sawiin, hei hian inrelbawlna leh audit tawh chang bakah hamthatna dawn kawngah kawngro a su thui hle dawn a ni, a ti a. PACS member-te chu eizawnna leh sumdawnna bulthuma a awm, District pawimawh tak International Border Trading Point-a awmte an nih avangin hmasawnnate umpha zel turin a fuih nghal bawk.

He hunah hian Pu Lalbiakdika, Manager, MCAB Champhai leh Pi H.Lalhmachhuani, DDM, NABARD Champhai te'n powerpoint presentation hmangin PACS Computerisation chungchanga hriat turte an zirtir a; sawihona hun hman a ni bawk.

Uluk taka sawiho anih hnuah thukhawm chuan Champhai District chhunga PACS/LAMPS 10 te chu Sawrkar laipui project 'Computerisation of PACS' hnuaia thuamthat turin State Level Committee pawmpui tura thawn nise a ti a. PACS dangte pawh a tahtawla hmalak anih theih nana inbuatsaih zel tura chah an ni.

Primary Agricultural Credit Societies (PACS) te hi India ramah chuan mipui nawlpui, abikin thingtlang loneitu leh bank-in a ban phak lohte tana sum dah luh, lakchhuah leh puk theihna hnaivai leh awlsam ber a ni a. Centrally Sponsored Project Computerization of Primary Agricultural Credit Societies hi Ministry of Co-operation, Govt. of India bultum a ni a. Kum 5 (2022-2023 to 2026-2027) chhungin India ram chhunga PACS leh LAMPS 63,000 vel dawnte chu computer leh khawl changtlung zawk hmanga thuamthat vek hman tum a ni a. Project senso atan hian cheng vaibelchhe 2,516 ruahman niin, PACS pakhat zelah Rs 3,91,369 ruahman a ni.

Computerization of PACS kaltlang hian PACS hrang hrangte kalphung inangtlang, awlsam leh him zawka accounting neih, langtlang taka sum enkawlte, a dawngtu tur dik takin awlsam taka tanpuina sum a dawn theih nan leh awlsam taka sum tih chet nante a tangkai dawn a. Hemi hnuaia hamthatna dawng theite chu mumal taka PACS kal lai mek Financial year hnuhnung bera audit paltlangte, PACS computer la hmang lo emaw, PACS computer hmang tawh tih changtlun la ngai emaw, PACS State sawrkar kaltlanga computerize tawhte ngaihpawimawh hmasak an ni a. PACS thlante hi District Level Implementation and Monitoring Committee (DLIMC) in State Level Implementation and Monitoring Committee (SLIMC) ah a thlen ang a, State Level Committee in chu rawtna chu NABARD-ah a thlen leh dawn a ni. Project tihhlawhtlin anih chuan PACS hnathawhte a lo rang ang a, a dik bawk ang a. Record-te him zawka dahthat leh vawn niin, report hrang hrangte awlsam takin a neih theih bawk a. Pawisa khawih chingpen a veng ang a, PACS staff, member leh mipuite him leh rang zawkin a indawr theih tawh dawn a ni.