2839/2022-2023

Kolasib dated 28th November 2022: Vawiin khan DC Conference Hall, Kolasibah District Aids Prevention & Control Committee chuan Deputy Commissioner Pu John LT Sanga, Chairman, DAPCC hovin thutkhawmna an nei a. Hemi ni pual a lemziah intihsiakna kalpui dan tur sawi ho niin, Ni 12, December 2022 hian School of Nursing, Thingdawlah ‘World Aids Day 2022’ chu hman ni se tiin an rel.

Vawiin thutkhawm ah hian Kolasib khaw chhunga zirna in hrang hranga HIV/Aids lak a invenhimna hawi zawng a lem inziahsiakna kalpui dan tur sawi ho a ni a. Middle School level tan ‘How to say NO to Drugs’ tih thupui hmangin lem ziahsiak hi neih tur a ni ang a. High School level tan ‘Harmful effects of sharing Needles & Syringes’ leh Higher Secondary School level tan ‘Condom Use Vs Contraceptive pills for HIV prevention’ tih thupui hmang a lemziah intihsiak hi neih bawk tur a ni ang. Kolasib khaw chhunga Middle, High School leh Higher Secondary School zirlai,’World Aids Day 2022’ pual a lem ziahsiak a tel turte tan a hriattur pawimawhte chu District Education Office-in a tul angin hming thehluh dan tur, a hun leh a hmun te ruatin hriattirna a tichhuak leh dawn a ni. Thutkhawm a tarlan danin lemziah intihsiakna hi Ni 9, December 2022 chawhnu lam a neih tur a rel a ni. Lawmman pakhatna in Rs. 3000, pahnihna in Rs. 2000 leh pathumna in Rs. 1000 a keng tel ang a, Ni 12, December 2022, ‘World Aids Day’ lawmna hun ah lawmman hi sem tur a ruahman a ni ang.

Kolasib District Task Force Committee for Malaria Elimination chuan thutkhawmna nei zui nghalin Dr.RK Lalthlamuana, SMO in Kolasib district chhunga Malaria do rem nana hmalakna hrang hrang leh district dinhmun tarlanna hun a hmang a. Kum 2022 January atanga October thleng a thisen 18,419 endik tawh ah mi 18 chuan malaria an vei tih hmuhchhuah a ni a, chung zinga 8 chu malaria pf an ni. SMO tarlan danin Kolasib district-ah hian kum 2021 leh 2022 chhung hian Malaria vang a boral an awm lo a, damdawi hmang a chiah thosi len (Insecticide Treated Nets) leh Long Lasting Insecticidal Treated Nets (LLIN) hmanna chuan nasa takin Malaria darh zel tur a tih tlem phah thu ngaihthlak a ni bawk.

Vawiin thutkhawm ah hian Kolasib district-ah Dengue endik tawh 171 atangin mi 10 vei hmuhchhuah a nih thu tarlan a ni a. Dengue keng darhtu thosi inthlahpun dan te, Dengue natna lanchhuah dan leh he natna darh zel tur ven dan hrang hrangte sawi ho a ni a. Dengue natna vei inringhlel te chu rang tak a thisen endik vat a pawimawh thu te, tui tling awm lo tur a in leh a vel vawn fai leh tui dah khawlna phui tak a khuh that a pawimawh thu te ngaihthlak a ni a. Dengue chu thosi ten an put darh zung zung avangin Sawrkar department hrang hrang leh NGO ten mipui nawlpui hnenah uar zawk a zirtirna pek a pawimawh thu sawi a ni bawk.