Chief Minister hmu tura Mizorama lokal, Paite Tribe Council of Manipur (PTCM) chuan vawiin khan Chief Minister Pu Lal Thanhawla chu a office chamberah hmuin Zohnahthlakte hmakhua ngaia nasa taka hma a laknaah Pu Hawla hnenah lawmthu an sawi.

PTCM hruaitute chuan Manipur sorkarin nikum lama bill pathum an passed tak, Manipur tlangmiten nasa taka an dodal chungchangah Chief Minister Pu Lal Thanhawla’n tlangmi Zohnahthlakte thlavang hauha central sorkara a hmalak zuina chu thlamuanawm tiin, nasa takin a hnenah lawmthu an sawi a. Manipur tlangmite tana Pu Hawla hmalaknaa lawmthu an sawina pakhat, kumin kum bul lama Ukhrul, Manipura ‘Lui Ngai Ni’ Kuta United Naga Councilin Kut hi chhim tura an sawmna te an sawilang nghe nghe a ni.

PTCM hotute chuan hmundanga Zohnahthlakte tana Chief Minister Pu Lal Thanhawla hmalakna leh an thlavang a hauhna chu fakawm an tih thu sawiin, a kaihhruaina hnuaia awm chu thlamuan thlak an tihzia Pu Hawla hi an hrilh a ni.

PTCM hruaitu lokalte hi Pu L.Punlian Pau, President, Pu John K.Ngaihte, Gen Secy, Pu Chin Khan Mang Ngaihte, Secy (Organisation), Pu H.Panzalal, Secy (Internal), Pu H.Pan Khenming, Secy (Fin) leh Pu Thang Khansiam, Tlangnuam te an ni.