1372/2022-2023

Aizawl, the 27th July 2022: Environment, Forests & Climate Change Department, Government of Mizoram chuan Siaha District  chunga Pala Dil leh a chhehvel( Pala Wetland) chu Ramsar Site-ah puan a ni tih a tlangzarh a. Hemi chungchangah  hian  a hnuaia tarlan ang hian thuchhuah an siam a ni. 

Ni 26.7.2022 (Thawhlehni) khan Pala dil leh a chheh vel (Pala Wetland) chu India ram hmun dang a wetland pali (4) te nen Ramsar site (khawvel pum a wetland pawimawh bik) a puan a ni. Hei hi thil chhinchhiah tlak bik leh Mizoram a a vawikhatna a nih avangin ramngaw leh nungcha humhalhna kawngah rilru thar leh phurna thar min put tirtu a nih ngei beisei a ni.

Pala wetland hi MADC huamchhung, Phura khaw bula awm a ni a, thing leh mau leh nungcha-ah a hausak mai bakah hmun danga hmuh tur awm zen zen tawh lo te pawh an awm avangin Sawrkar laipuia Ministry of Environment, Forests & Climate Change kaltlangin Ramsar Secretariat ah ‘Ramsar site’ atan rawt a ni a, tehna hrang hranga an lo teh hnuah pawm a ni ta a ni.

Pala dil hi tuipui zawl (sea level) atanga 274 meters a sang a awm a ni a, dil leh a chhehvel sq.km. 24 hi Reserved Forest niin Ramngaw, kum tluana hring reng (semi-evergreen forest) in a hual vel a. Sava chi hrang hrang, bawk vaka kal chi (reptiles) chi hrang hrang, nauban leh thing chi hrang hrang a tam bakah sava pem chi thenkhat ten an tlawh thin bawk. 

Wetland awmzia chu hmun hnawng, tuiin a chim reng emaw, a chim fo thin tihna a ni. Thing leh mau leh nungcha tinrengah an hausa in tui hna siam leh tih thianghlim kawngah an thawhhlawk hle thin. Mizoram hian hetianga hmun hnawng (wetland) hi kan nei nual a, tunah hian wetland pahnih – Tamdil leh Pala te hi State Board for Wildlife kaihhruaina hnuaiah a chhehvel mipui te nen tang hovin Environment, Forests & Climate Change Department (EF&CC) chuan a enkawl mek a ni. Wetland hi a pawimawh em avangin EF&CC Department chuan a tam thei ang ber enkawl leh humhalh turin tan a la mek bawk.

Attachment

  • Loading attachment...