1894/2025-2026

Siaha the 14th October 2025: District Planning Committee, Siaha thutkhawm chu vawiin khan DC Conference hall-ah thutkhawmna neih a ni a, 40-Palak (ST) A/C Bialtu MLA Pu K Hrahmo chuan he thutkhawm hi a tel pui.

Pu K Hrahmo, Palak Bialtu MLA chuan District tih hmasawnna tura scheme thar duan thutkhawm hmasa bera a tel thei chu lawmawm a tih thu a sawi a, kalkhawmte chu district tihchangtlunna kawnga theihtawp chhuahpui turin a ngen.

Vikshit Bharat 2047 atan kum 22 chauh a awm tawh a, Developed India kan nih theihna tura dal tu awmchhun chu retheihna a ni tiin chu retheihna umbo tur chuan Sawrkar scheme hrang hrangte hmang tangkai thiam a, inzir chho zel turin a sawm a, district mipuite hmakhua ngaia, hmasawnna changtlung a awm theihna tura theihtawp chhuahpui turin department hotute a sawm a ni.

District Planning Committee Chairman Pu VL Hruaizela Khiangte, District Bawrhsap ni bawk chuan he hun hi a kaihruai a, Mizorama district te tihchangtlunna tura Sawrkar scheme thar Mizoram District Transformation Programme chu a pawimawh hle a, Department hotu kalkhawmte chu district hmasawnna tura an mamawh leh ngaih pawimawh zawngte ngun taka ngaituah turin a chah. District Bawrhsap chuan DPC Member Secretary Pu R Lalfakzuala chu he scheme thar chungchang sawizauna nei turin a sawm chhunzawm nghal a ni.

Pu R Lalfakzuala chuan MDTP chu India in zalenna a hmuh kum 100na (Vikshik Bharat 2047) a developed country a nih theihna tura inbuatsaihna peng pakhat a ni a ti a, Grassroot level atanga district mamawhte ngaituah hova, rahbi thar kaina tham hmasawnna district in a hmuh theih nan leh Kum 2047 a Transformed Mizoram a awm theih nana duan a ni, a ti.

He meeting-ah hian District Planning Committee in hma a lak dan tur hrang hrangte, sawrkar department hrang hrang ten an tih turte inhrilhfiah a ni a, plan hi a hlawhtlin theih nan Department tinte thawhhona tha (Convergence) a pawimawh thu sawi a ni bawk a ni. Mizoram District Transformation Programme hnuaia Peng hrang hrang 4 awm te tarlan a ni a, District Baseline Profile buatsaih a tul thu te, District Transformation Vision siam te, District Catalytic Intervention Plan hnuaia fund awm thei te bakah District Catalytic Fund chungchangte sawiho a ni. He scheme hnuaiah hian a kum 1na atan Mizorama district 11 tan 1 crore theuh ruahman a ni a, DPC member te chuan district mamawhte ziakin District Planning Committee ah an thehlut anga, DPC in an thlifim leh dawn a ni. A kum 2na atang erawh Performance based in Fund hi semchhuah a ni tawh dawn a ni.

MLA Pu K Hrahmo bakah MADC Dy CEM Pu S Lalremthanga, District Bawrhsap Pu VL Hruaizela Khiangte, Addl DC Pu Abraham Beirazi Khithie, Addl SP Pu Beimosia Lapi leh district a department hotute leh NGO aiawhte an tel a ni.