1893/2025-2026

Aizawl, the 14th October, 2025: National Dairy Development Board (NDDB), Anand, Gujarat, A.H & Vety. Department, Mizoram State Rural Livelihoods Mission (MzSRLM) leh SIRD&PR, Mizoram tangkawpte buatsaih ni 17 (14-30 October, 2025) chhung awh, 'Training for A-Help (Accredited Agent for Health and Extension of Livestock Production)', Batch 8 leh 9 te tana buatsaih chu vawiin khan SIRD&PR Auditorium, Durtlang Leitan-ah hawn a ni a. He hun hi Dr. R. Zothanmawii, Director, AH&Vety. Department leh Pi Zosangzuali Pachuau, Chief Executive Officer (CEO), Mizoram State Rural Livelihoods Mission (MzSRLM) te'n an hmanpui a ni.

Training hawnna hun Dr. Lalramngheta, Deputy Director (Piggery Development), A.H & Vety. Department kaihhruaiah hian A.H & Vety. Director Dr. R. Zothanmawii chuan A-Help kalphung sawifiahin, buai tak kara chhungkaw nu ber engemawzatin training an ngaipawimawh chu lawmawm a tih thu a sawi a. A-Help training chhuak tawhte an khua theuha tangkai taka an thawk thin chu lawmawm a tih thu a sawi bawk.

Pi Zosangzuali Pachuau, CEO, MzSRLM chuan Self Help Group member-te chu anmahni khua theuhah midangte tana malsawmna ni zel turin a chah a. Training ngaipawimawha chhawr tangkai tum tura fuihin, an thil zirte mahni veng/khua theuha an let hunah ataka hman tangkai tum turin a chah a. A.H & Vety. Department nena thawhhona tha tak an nei thin chu lawmawm a tih thu a sawi bawk.

Training hawnna hunah hian Dr. Lalhruaitluangi Sailo, Sr. Core Faculty, SIRD&PR, Training Manager ni bawk chuan Training chhunga hriattur tlangpui a sawi a. Training-a telte hi ran enkawlna atana an hman tangkai tur 'A-Help Kit' pek vek an ni bawk.

Training chhung hian Master Trainer hrang hrang - A.H & Vety. Department atangin Dr. Malsawmtluangi Ralte, Dr. Lalrengpuii Sailo leh Dr. Michael V. Lalrinzuala te bakah MzSRLM atangin Pu Lalremtluanga leh Pu Denis V. Lalhlimpuia te'n zirtirna an pe thin dawn a. Training kaltlang hian Zawlnuam, Ngopa, Hnahthial, W.Phaileng, Khawzawl, Kawrtethawveng, Aibawk leh Tlangnuam RD Block atanga MzSRLM hnuaia Livestock Community Resource Person thlan bik mi 50 te hnenah zirtirna pek a ni ang.