Health & Family Welfare Department chuan Pa(mushroom) chungchanga hriattur pawimawh mipuite hnenah an rawn tarlan belh a. Principal Secretary, Health & Family Welfare Department chuan Pa(mushroom) ei chungchangah mipuite fimkhur tura chahin a hnuai ami ang hian hemi chungchang hi a rawn sawi.

Tun hnaiah Pa (mushroom) eisuala nunna chan leh harsatna nei an awm ta hi a pawi hle mai a. Hemi chungchangah hian mipuiten thil chinchang kan hriat chian tawk loh avang a ni tih a chiang a. Mipuiten thil zir tur leh ngaihven kan mamawhzia a tarlang tel bawk a ni.

Pa (mushroom) chanchin hi kan hriat chian a pawimawh a, hetiang hian Pa chanchin leh nihphung tlangpui kan hriat awm deuh deuhte lo tarlang ila, chemical hming harsa deuh ni hlawm mah se kan hriatna tizautu ni nghal turin dah chhuah tel a ni:- Pa( Mushroom) a chemical hlauhawm awm theite:

1. Alpha-amanitine: Hei hian Pa ei atanga ni 3 chhungin thin (liver) a ti chhe vek thei a, thihna a thlen tlangpui.

2. Phallotoxin: Hei hian thihna thlen lo mahse pum na a thlen thin.

3. Orellanin: Hei hian Pa ei atanga ni 3 chhungin kal(kidney) a ti chhia a, thihna a thlen tlangpui.

4. Muscarine: Hei hian thawkna kawng a ti buai a, thawchham thlenin thihna thlentu tam ber a ni.

5. Gyromitrin: Hei hian pum a tina a, hriatna a ti buai a, mihring a ti a vek thei. Mi tam takin an thih pui.

6. Coprine: Hei hi a bikin zu nen a ei pawlh in taksa a ti chau em em thei a, thihna a thlen chiah hriat a ni lo.

7. Ibotenic acid: Hei hian nerve ti buai in thihna thlentu tam ber a ni.

8. Muscimol: Hei hian ngaihtuahna a ti buaiin mumang ram ang maiah mihring a awm tir a, thihna thlentu tam ber zinga mi a ni.

9. Psilocybin and Psilocin: Hei hian thihna hial a thlen tu report awmlo mahse mihring ngaihtuahna a ti a vek thin.

10. Arabitol: Hei hi thihna thlen chiah lovin pum na leh luak a thlen nasa hle a ni.

11. Bolesatin: Hei hian pum na, luak leh luhai a thlen nasa hle.

Pa-in heng chemical thil a pai te hi Pa chi khat chauha awm an ni lova, Pa chi hrang hrang ah te chi khat emaw chi hnih emaw te hmuh tur an awm tlangpui a ni. Pa chi hrang a zirin an chemical neih te hi a danglam thin a, chuvang chuan heng rah zawng zawng hi Pa ei sual ah a vai hian lang vek tura ngaih tur a ni lova, Pa a zirin a then a langin a lang lo thei bawk a ni.

Pa te hi an lan dan atang ngawtin ei sual chi leh ei sual loh chi hriat an ni lova, chuvang chuan mipui te kan fimkhur a tul hle a ni.