2510/2022-2023
FDA Mizoram chuan damdawi chi hrang hrang quality that leh that loh a endik reng a. Tunhnaia Pantop-D SR endikna report-ah 'Damdawi ei tlak loh' (Not of Standard Quality) tia tarlan a ni chuan mipui a tichiai hle tih hriat a ni a, a pawi hle a ni. Damdawi lar leh hriat hlawh a nih avangin mite ngaihven a hlawh zual niin a lang.

He Pantop - D SR quality endik hi Batch No. - SPM211927, Mfg. Date - Dec.2021, Exp. Date - Nov.2023 a ni a. Label-a a lan dan chuan a chhungah Pantoprazole 40 mg (20 mg mum hnih) leh Domperidone pellets 30 mg awm tur a ni. Analysis Report chuan heng damdawi chi hnihte hi a awm lo ve ve (NIL) a ti a. Chuvang chuan quality tha lo/tling lo tih a ni ta a ni.

He Report avang hian Pantop - D SR zawng zawng tha lo vek anga ngaih tur a ni lo va, a batch number tarlan ang pu chauh te 'tha lo' tih hian a kawk zawk a ni. Chuvangin, ei mek tan pawh batch number dang a nih chuan hlauhthawn tur engmah a awm lo ve.

A siamtu anga tarlan ARISTO Pharmaceuticals-ah a tul anga hmalak nghal a ni a. An siam ngei a ni nge misual tuten emaw Aristo Company siam anga lang tura a lem (spurious) an siam tih a hriat theih thuai ang.

Damdawi lar tamtak zingah hian a lem awm theihna chance a sang em em a, a dapchhuah hna hi FDA hmalakna pawimawh tak a ni. Damdawi zuartute pawh zawrh tura damdawi an lakna kawngah an fimkhur hle a ngai a ni.