2509/2022-2023
Aizawl the 1st November 2022 : Social Welfare & Tribal Affairs Department-in Ministry of Tribal Affairs GoI atanga an dil chhuah, cheng nuai 100 senga sak zawh, Youth Development Centre (YDC) Ngopaa mi chu vawiin khan Social Welfare & Tribal Affairs Minister Dr. K.Beichhua Office Chamber-ah Sialkal Range Development Council (SRDC) kutah hlan a ni.

Youth Development Centre hlanna lehkhaah hian Social Welfare & Tribal Affairs Department aiawhin Pu Arun Mishra, IAS, Secretary leh SRDC aiawhin Pu Remlalliana Hnamte, MCS, Development Officer, SRDC ten hming an ziak a ni.

YDC Building hlanna inkhawmah hian Dr. K.Beichhua chuan thalaiten eizawnna puitling an neih theihna tura tangkai taka YDC building hi hman anih a duh thu leh SRDC area leh Ngopa chhehvel thalaite tana malsawmna a nih ngei duhsak chungin he YDC building hi SRDC kutah a hlan a ni.

SRDC Chairman Pu L.Thangmawia, MLA pawhin thusawiin MLA anga ka rawtna te Social Welfare Minister-in min ngaih pawimawh sakin, kum 2019 kum tir khan YDC Building sakna tur chu Central-ah a thlen a, a sak zawhna rei deuh tawh mahse Covid hripui avangin kumin ni 10.9.2022 khan Social Welfare Minister chuan a hawn sak thei chauh a ni a ti a. YDC hi tangkai zawka kalpui a nih theih nan SRDC Council Meeting ni 22.3.2022-a neih chuan YDC enkawl hi dil ni se tiin lungrual takin a passed angin, an dilnate ngai pawimawh a, YDC Building enkawl phal sak an nih chu SRDC tan chuan mellung pawimawh tak a ni a ti. YDC hi SRDC area mai bakah Ngopa chhehvel thalaite tan tangkai taka hman tum a ni a, thalaite mamawh training hrang hrang buatsaih theih nan rawtna a duh apiangin rawn thlen theih reng a ni a ti bawk.

He huna tel ve SRDC Member, Champhai North bialtu MLA, Dr. ZR Thiamsanga pawhin thusawiin YDC hi tangkai taka hman a nih ngei a beisei thu leh he building petu Social Welfare & Tribal Affairs Minister leh Department te chungah lawmthu a sawi a ni.

Vawiina YDC hlanna inkhawmah hian Pi Donnie, Joint Secretary, Social Welfare & Tribal Affairs Department, Pu Remlalliana Hnamte, Development Officer, SRDC leh Pu F. Lalnunmawia, Consultant, SRDC te an tel a ni.