2508/2022-2023
Aizawl the 1st November, 2022 : Vawiin khan Commissioner & Secretary, Transport Pu K.T. Beicho, IRAS, chuan mipuite hman theih turin Faceless Application for Learner’s Licence chu Transport Directorate Conference Hall ah a hawng.

Hawnna hunah hian thu sawiin Pu K.T. Beicho chuan sorkar laipuiin Information Technology bakah Artificial Intelligence a ngaih pawimawh thu a sawi a, Transport department chuan National Informatics Centre (NIC) nena thawhhona tha tak nei zelin mipuite awlsamna tur zawk chhawpchhuah zel an tum thu leh Faceless Application for Learner’s Licence chuan mipuite sum leh hun tam tak a hum tur chu lawmawm a tih thu a sawi. Transport Director Er. R. Lalrammawia chuan IT hmasawnna chuan awlsamna tam tak a thlen thu a sawi a. Ram a than ang zela hna tam zel karah pawh IT thiamna chuan mipuite mamawh pe thei tura puitu a ni a ti.

Hawnna hunah hian National Informatics Centre aiawha report petu Pi Lalmuanpuii chuan Faceless Learner’s Licence hi mipuiten Office-a kal ngai lova inlum atanga awlsam taka , engtik lai pawhin, khawi hmun atang pawhin Learner’s Licence lak theih tura buatsaih a ni a ti a. Mipuite harsatna hria a Transport Department-in DTO Office a mipui inhnawh tawt lutuk thin te, thui tak tak in line ngai thin te ti bovin - mitinin mahni inlum atanga awlsam zawka Learner Licence lak theih turin hun rei tak atang khan hmalak a lo nih tawh thu a sawi a. Faceless Learner’s License bakah hian service dang 58 - Vehicle Related Service leh License Related Service ah te mipuiten awlsam zawka office kal ngai lova an dawr theihna turin hmalak mek a nih thu a tarlang bawk.

Learner’s Licence dil tur hian Sarathi Portal sarathi.parivahan.gov.in/sarathiservice emaw Transport Department website transport.mizoram.gov.in ah kalin - Apply for Learner Licence ah luh tur a ni. Aadhar based authentication (e-KYC) leh Aadhar tel lovin dil theih a ni ang.Aadhar based authentication ah hian One Time Password (OTP) angaih avangin kan Aadhar a mobile number leh kan mobile number hman lai mek a inmil angai dawn a ni. Aadhar tel lova dilna erawh kum leh nihna tihchianna document dang online application ah dah telin, heng document te hi DTO in a dik ngei a ni tih a enfiah angai dawn thung a ni. Counselling leh exam te hi online hmangin Mizo tawng ngei a tih theih a ni.

Vawiina hawn tak Faceless Application for Learner’s Licence hi hman tan nghal a ni a, hemi rual hian offline-a DTO office-a Learner Licence dil thin chu tih tawp nghal a ni.