2507/2022-2023
Lunglei the 1st November, 2022 - Lunglei District huam chhung Aizawl-Thenzawl-Lunglei (ATL) World Bank kawng 100Km-160Km (Kanghmun – Lunglei( kawng dinhmun chungchangah vawiin khan Lunglei DC Pu Kulothungan A kaihhruaiin DC Conference Hall-ah meeting neih a ni.

Meeting-ah hian Lunglei SP Pu Rex Zarzoliana Vanchhawng, SE Lunglei Circle, PWD Er Lalthanzuala leh official dangte; Sub Hqrs YMA President Pu Lalrotluanga, Lunglei MJA President Pu Laltlanthanga, MHIP President Pi Lalliannguri te bakah Bhavya Construction aiawhin Pu Horendra Kumar Barua, Project Manager te an tel a ni.

Hemi chungchangah hian September ni 26 khan Lunglei DC Office Chamber-ah thutkhawmna lo neih tawh niin Bhavya Construction-te chuan October thla ral hma ngeia repair hna thawh zawh anlo in tiam tawh a. Hna hi la thawh zawh loh niin kawng dinhmun pawh ala chhiat em avangin vawiin meeting hi koh nawn leh a ni. Defect liability period hi 31.3.2023 thleng a nung a ni.

Lunglei DC Pu Kulothungan A chuan Bhavya Construction te hnathawh leh an hmalaknate a that tawkloh thu sawiin kawng repair hna chu zawhfel thuai anih theihnan chak taka hma la turin a hriattir a. Hnathawh kal mek chu uluk taka enfiah tur leh a tul anga na taka nawr turin PWD hotute pawh a ngen a ni. Lunglei Bawrhsap chuan kawng chhe tak avangin chhimlam mipuiten harsatna nasa tak an tawrh thu sawiin District administration chuan mipui himna a dah pawimawh hmasak ber thu leh kawng chhiat avanga tawh sual tawk palh an awm hlauh te pawh a hlauhawm thu sawiin zo fel thuai tura hma la turin a chah a ni.

October ni 28 (Zirtawpni) khan Sub Hqrs YMA Conference Hall-ah PWD CE (P)Er Lalrinkima Hnamte hovin hemi chungchangah hian inkawmhona neih alo ni tawh a. PWD chuan Bhavya Construction chu December ni 20 hma ngeia repair hna thawk zo turin an hriattir a. Labour 14 thawk mek bakah thawktu 20-30 lak belh turin an hriattir bawk a ni. November ni 5 ral hma ngeia hmalakna thar hmuh anih loh chuan Bhavya Construction te security deposit hmanga hna hi thawh anih tur thu SE Lunglei Circle, PWD Er Lalthanzuala chuan a sawi a ni.

Sub Hqrs YMA, Lunglei hotute hian nimin khan Sekhum dai thleng hnathawh hi a hmunah kalin an enfiah a. Sub Hqrs YMA President Pu Lalrotluanga chuan kawng chhe siam hna thawh mek chu duh thu a sam loh thu leh a tul anga hmalak zel dan tur ngaihtuah turin zaninah YMA Sub Hqrs Executive committee (SEC) meeting koh anih thu a sawi a ni.