February ni 13 atanga 16, 2020 chhunga Mizoramin a thlen tur Paragliding Accuracy World Cup, 2020 atana inbuatsaihna kalpui chhunzawm zel a ni a. Vawiin khan Organising Committee Co-Chairman Pi Esther Lalruatkimi, Tourism Secretary hovin a pisaah Organising Committee member-te an thukhawm.

Adviser to Chief Minister leh Organising Committee-a Patron ni bawk Pu Lalramzauva chuan Serchhip-a World Cup nghahna tur hmunhma tum li a tlawh tawh thu leh a hlawhtlin theih nan theihtawp chhuah mek a nih thu a sawi a. Pi Esther Lalruatkimi pawhin Mizoramin World Cup a thlen vawikhatna tur a nih angin he hun pawimawh tak hi hlawhtling taka neih a nih theih nan inbuatsaihna hun tlem te la awmah theihtawpa tan la turin mawhphurtute a chah a ni.

Paragliding Accuracy World Cup, 2020 ah hian ram hrang hrang 30 atangin mi 120 vel tel thei tura beisei a ni a. Tun dinhmunah ram 13 atangin mi 60 an in ziak lut tawh a ni. Anni bakah hian official engemawzat lo kal tura beisei an ni a. National level leh International level atangin a hmunhma thlithlai turin technical team 2 an lo kal dawn a ni.

Vawiin meeting-ah hian mawhphurtu hrang hrangte hmalak tawh dan ngaihthlak niin an hmachhawp te sawiho a ni bawk a. Sum leh pai mamawh tur uluk taka rel niin sum hmuh tur beisei zat leh hmanna tur tlangpui duan a ni.