Nimin khan sorkar thil pawimawh buaipuia N.Delhi-a cham mek Parliamentary Secretary Pu Joseph Lalhimpuia chuan DoNER Ministry a dawr a. Lunglei-a Education Centre sakna tur cheng vaibelchhe 10.4 dilna a thlen chu DoNER Ministry chuan a remtih a nih thu an lo hrilh a ni.

Parliamentary Secretary Pu Joseph Lalhimpuia chuan nimin khan DoNER Secretary Pu Naveen Verma  leh DoNER Director Mizoram changtu Ravinder Chaudhury chu a hmu a. Lunglei-a Education Centre sakna tur a sawipui a, DoNER Secretary leh Director te inrawnkhawm chuan NLCPR hnuai atanga sak turin cheng vaibelchhe 10.4 chu remtih a nih thu Pu Joseph Lalhimpuia an lo hrilh nghal a ni. DoNER Ministry thuneitute chuan Lunglei-a Education Centre sakna atana thil tul zawng zawng hi DoNER hian a pawmpui vek tawh avangin tun atanga rei vak lovah a sum pawh sanction theih a nih tur thu an hrilh bawk.

Pu Joseph Lalhimpuia chuan Lunglei-a Education Centre sak tur chu Mizoram-a Education Infrastructure lian ber a ni dawn a ni tih DoNER hotute a hrilh a. Lunglei-a Education Centre sak tur hi building pahnih a ni dawn a - building lian zawk chu chhawng 5-a sang a ni ang a, DEO, SDEO  office te leh MBSE office te pawh leng vek tura duan a ni a; building te zawk chu chhawng 3-a sang a ni ang a, teachers training leh thlenna atan hman theih a ni dawn thung a, motor 40 vel leh two wheeler thahnem tak dahna a awm dawn bawk a ni.

Nimin vek khan Pu Joseph Lalhimpuia hian DoNER Director Mercy Epao pawh a hmu a. Mercy Epao chuan DoNER dincham vawi 16-na pualin thla leh September 9 & 10 hian N.Delhi-a India Gate Circle-ah ‘North East Calling’ buatsaih a nih dawn thu a lo hrilh a, he hunah hian Handloom leh Handicraft phochhuahna te pawh a awm dawn a, Commerce & Industry changtu a nih angin tel ngei turin a lo sawm nghal a ni.