Social Guidance Agency General Assembly vawi 26-na chu vawiin khan SGA Centre (PTC Lungverh bul) ah hman a ni a, Parliamentary Secretary to CM Pu Lal Thanzara chu Khuallian niin SGA Centre Gate thar, kawng thar leh building thar te a hawng nghal a ni. SGA Centre-a hman atan Bolero motor thar an neih chu Rev.V.Vanlalchhunga, BCM in a hlan bawk a ni.

Social Guidance Agency General Assembly leh thil thar hrang hrang lawmpuina thu sawiin Pu Lal Thanzara chuan nun rahbi tleu laklawh te, mi pangaiten thian leh hmelhriat atan pawha duh lo thin, taksa leh thlarau lama dam lote, duat tak leh rinawm taka an enkawlna chu a fakawmin a entawntlak hle a ni, a ti. Mi chanhai zawkte tan rawngbawlna kalpui mek NGO leh Para-church te hna a hau takzia a hriatpui thu sawiin Pu Thanzara chuan hun lo kal zelah pawh Social Guidance Agency-te chu theih ang anga tanpui a tum thu a sawi a ni. Mi tin hi kan awmna hmun apiang hi Pathianin a rawngbawl tura min dahna a ni tih hre reng turin kalkhawm zawng zawngte a chah.

Social Guidance Agency Board Member Dr. C.Lalbiakmawia chuan SGA tobul leh hmalaknate sawizauna neiin SGA chu tlawmngai pawl te zinga mi, Chanchintha avanga Pathian mite thawhhona tura buatsaih a ni a, kohhran leh pawl hrang hrang atanga mi in pe zo mi 50 velin SGA kaltlanga rawngbawlna an neih mek thu a sawi a. SGA-in Project a kalpui mek te chu :- Integrated Rehabilitation Centre for Addicts, Mobile Medical Clinic, Family Counselling Centre, TI Project (DRop-in Centre) leh After Care centre te a ni. Kum 1990 atang khan Sorkar laipui chuan tanpui tlaka ngaiin Grant an rawn pe tan ta a ni.

Vawiina hawn tak SGA Life Saving Station ( Integrated Rehabilitation Cebtre for Addicts) hi Ministry of Social Justice & Empowerment bultuma buatsaih a ni a; SGA Centre Gate thar hi Pu F.Hrangvela, Upper Khatla bultumin siam a ni a. Vawiin inkhawmah khan Khuallian Pu Lal Thanzara chuan Social Guidance Agency dintu Upa C.Dozuala, Founder & General Secretary, chuan kum 70 a tlin lawmpuina leh chawimawina Citation a hlan bawk a ni.