Zofate inpumkhatna kut 'Zofa Global Unity Fest', nimina Champhai Zokhawthara Deputy Speaker Pu R. Lalrinawma'n a hawn chu vawiin khan chhunzawm niin, Parliamentary Secretary leh Champhai North bialtu MLA ni bawk Pu T.T. Zothansanga chuan a hmanpui. He hunah hian Pu T.K. Darnei (Biate), Ex-MDC, India chu Khualzahawm a ni.

Khuallian Pu T.T. Zothansanga chuan vawiin hun chu hun lawmawm tak a ni tiin, hetiang ang ni hi hmana kan nu leh pate pawhin hmuh an lo chak ngei a rin thu a sawi a. Ram hrang hranga kal chang pawhin Zofate an fel theiin, tlawmmngaihna a takin an chhawmnun zel thu a sawi a. Zofate thinlunga kan inpawh tlatna hi kan dinkhawchhuahna tur a ni tih hriain, kan inzawmkhawm tlat a ngai a ni, Pu T.T. Zothansanga chuan a ti a ni.

Vawiin hunah hian Khuallian chuan mi 11 hnenah Zofa Global Award a hlan bawk a. Heng chawimawina dawngtute hi he kut buatsaihtu Zofate Global Network-in Zofate insuihkhawmna atana hun leh tha, ngaihtuahna leh thu leh hla hmanga lo thawk tawh a thlanchhuahte an ni. Khuallian thiannu Pi J.H. Thangpuii chuan Zofa Global Unity Festival 2014 souvenir a tlangzarh bawk.

Vawiin Zofa Global Unity Festival-ah hian hmun hrang hrang atanga lo kal Zofaten zai leh lam in mipui an awi a. He kut hi 'Unau Kan Ni ' tih thupui vuahin, naktuk ni 22 (Inrinni) hian khar a ni ang a. Home Minister Pu R. Lalzirliana'n a hmanpui dawn a ni.